ആലപ്പുഴ: ഹിന്ദു ഐക്യവേദി പതിനാലാം സംസ്ഥാന സമ്മേളനം ഏപ്രില് ഏഴുമുതല് ഒന്പതുവരെ ആലപ്പുഴയില് നടക്കും. ഇതോടനുബന്ധിച്ചുള്ള സെമിനാറുകള് നാളെ തുടങ്ങുമെന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു പത്രസമ്മേളനത്തില് അറിയിച്ചു.
നാളെ വൈകിട്ട് നാലിന് ആലപ്പുഴ നഗരചത്വരത്തില് ‘പുന്നപ്ര – വയലാര് സമരത്തിന്റെ കാണാപ്പുറങ്ങള്’ എന്ന സെമിനാര് ജെഎസ്എസ് സംസ്ഥാന ജനറല് സെക്രട്ടറി കെ.ആര്. ഗൗരിയമ്മ ഉദ്ഘാടനം ചെയ്യും. മാദ്ധ്യമപ്രവര്ത്തകന് ടി.ജി. മോഹന്ദാസ്, ഇന്ത്യന് ചരിത്ര കൗണ്സിലംഗം ഡോ. സി.ഐ. ഐസക്, മുന് എംഎല്എ ഡി. സുഗതന്, അഡ്വ. കൃഷ്ണകുമാര് എന്നിവര് സംസാരിക്കും.
23ന് വൈകിട്ട് നാലിന് നെടുമുടി വിദ്യാധിരാജ ഓഡിറ്റോറിയത്തില് ‘കുട്ടനാടിന്റെ പൈതൃകവും ചരിത്രപശ്ചാത്തലവും’ സെമിനാറില് പ്രകൃതി സംരക്ഷണവേദി ചെയര്മാന് എം.എന്. ജയചന്ദ്രന്, ഡോ. അനില്കുമാര്, പരിസ്ഥിതി പ്രവര്ത്തകന് ഡോ. പത്മകുമാര്, ഡോ. ആര്.വി. നായര് എന്നിവര് പങ്കെടുക്കും.
26ന് രാവിലെ പത്തിന് ചേര്ത്തല എന്എസ്എസ് ഹാളില് ‘വെളുത്തച്ഛന് സത്യമോ മിഥ്യയോ’ സെമിനാര് ഹിന്ദു ഐക്യവേദി സംസ്ഥാന ജനറല് സെക്രട്ടറി ബ്രഹ്മചാരി ഭാര്ഗ്ഗവറാം ഉദ്ഘാടനം ചെയ്യും. ശബരിമല തന്ത്രി കണ്ഠരര് മഹേഷ് മോഹനര്, പന്തളം കൊട്ടാരം ട്രഷറര് നാരായണവര്മ്മ, ജി. അമൃതരാജ്, മുഹമ്മ ചീരപ്പന്ചിറ അയ്യപ്പധര്മ്മ പഠന കളരിയിലെ മാധവ ബാലസുബ്രഹ്മണ്യം, വിവിധ സമുദായ സംഘടനാ നേതാക്കളും പങ്കെടുക്കും.
ഏപ്രില് ഏഴിന് ആലപ്പുഴ ടൗണ്ഹാളില് ഹിന്ദു നേതൃസമ്മേളനത്തോടെയാണ് സംസ്ഥാന സമ്മേളനം ആരംഭിക്കുന്നത്. എട്ടിന് പ്രതിനിധി സമ്മേളനം ശക്തി ഓഡിറ്റോറിയത്തില് സ്വാമി ചിദാനന്ദപുരി ഉദ്ഘാടനം ചെയ്യും. ഒന്പതിന് പ്രകടനവും പൊതുസമ്മേളനവും പുന്നപ്ര കപ്പക്കടയില് നടക്കും. യോഗാചാര്യന് ബാബാരാംദേവ് പങ്കെടുക്കും.
സെമിനാര് ഓര്ഗനൈസിങ് കമ്മറ്റി കണ്വീനര് അഡ്വ. രാജന് ചേര്ത്തല, ജില്ലാ സംഘടനാ സെക്രട്ടറി കെ.ജി. സഹജന്, അമ്പലപ്പുഴ താലൂക്ക് സംഘടനാ സെക്രട്ടറി ടി. രതീഷ്ബാബു എന്നിവരും പത്രസമ്മേളനത്തില് പങ്കെടുത്തു.
