കണ്ണൂര്: മലബാര് കാന്സര് സെന്ററിന് സംസ്ഥാന മലിനീകരണ നിയന്ത്രണ ബോര്ഡിന്റെ ശുചിത്വ പുരസ്കാരം. ഇത് അഞ്ചാം തവണയാണ് മലബാര് കാന്സര് സെന്ററിന് സര്ക്കാരിന്റെ ശുചിത്വ പുരസ്കാരം ലഭിക്കുന്നത്. സംസ്ഥാനത്തെ വിവിധ സ്വകാര്യ, സര്ക്കാര് സ്ഥാപനങ്ങളോട് മത്സരിച്ചാണ് പുരസ്കാരത്തിന് അര്ഹരായതെന്ന് കാന്സര് സെന്റര് സര്ജറി വിഭാഗം ഡോ.ചന്ദ്രന് കെ.നായര് വാര്ത്താസമ്മേളനത്തില് പറഞ്ഞു.
ഏകദേശം രണ്ടായിരത്തിനും മൂവായിരത്തിനും ഇടയില് ആള്ക്കാര് വന്നുപോകുന്ന ആശുപത്രിയില് 400 കിലോലിറ്റര് സംസ്കരിക്കാന് കഴിയുന്ന മാലിന്യ സംസ്കരണ പ്ലാന്റാണ് പ്രവര്ത്തിക്കുന്നത്. അള്ട്രാഫില്ട്രേഷന് സൗകര്യമടക്കമുള്ള പ്ലാന്റാണിത്. പ്ലാന്റില് നിന്നുള്ള വെള്ളം ശുദ്ധികരിച്ച് ആശുപത്രിയിലെ കാമ്പസില് ജൈവ പച്ചക്കറി കൃഷി ചെയ്യാനും ഉപയോഗിക്കുന്നുണ്ട്. 2014ല് ജില്ലയിലെ ഏറ്റവും മികച്ച പച്ചക്കറിത്തോട്ടത്തിനുള്ള സംസ്ഥാന കൃഷിവകുപ്പിന്റെ അവാര്ഡും ലഭിച്ചിട്ടുണ്ട്. ആശുപത്രി പരിസരം രോഗി സൗഹൃദമാക്കാന് ഗ്രീന് ബെല്റ്റ് തയ്യാറാക്കി സംരക്ഷിക്കുകയും ചെയ്തിട്ടുണ്ട്.
ഭക്ഷണത്തിനുള്ള പ്രാധാന്യം ഉള്കൊണ്ട് കൃത്യമായ മാനേജ്മെന്റ് വൈദഗ്ദ്യവും ശാസ്ത്രീയ മേല്നോട്ടവും സമന്വയിപ്പിച്ചാണ് കാന്റീനടക്കമുള്ള സംവിധാനമൊരുക്കിയത്. ഈ പ്രവര്ത്തനങ്ങള്ക്ക് 2015ല് ജില്ലയിലെ ഏറ്റവും ശുചിത്വമുള്ള സര്ക്കാര് സ്ഥാപനത്തിന് നല്കുന്ന ഗോള്ഡന് ക്രോ സ്വര്ണ്ണപ്പതക്കം ലഭിച്ചതും മലബാര് കാന്സര് സെന്ററിനായിരുന്നു. കുടാതെ സോളാര് സംവിധാനം കാര്യക്ഷമമായി ഉപയോഗപ്പെടുത്തിയത് പരിഗണിച്ച് ഊര്ജ്ജസംരക്ഷണത്തിന് സംസ്ഥാനതലത്തില് ഒന്നാം സമ്മാനവും ലഭിച്ചിരുന്നു. ഇതു കൂടാതെ 2015ല് മുഖ്യമന്ത്രിയുടെ ഇന്നവേഷന് ഇന് പബ്ലിക് പോളിസി അവാര്ഡും മലബാര് കാന്സര് സെന്ററിന് ലഭിച്ചിട്ടുണ്ട്.
മികച്ച നേട്ടങ്ങള് കൊയ്ത് സംസ്ഥാനത്തെ തന്നെ ഇതര സര്ക്കാര് സ്ഥാപനങ്ങള്ക്കുപോലും മാതൃക തീര്ക്കുകയാണ് മലബാര് കാന്സര് സെന്റര്. വാര്ത്താസമ്മേളനത്തില് കെ.ടി.സുധീഷ്, എ.കെ.രാജേഷ്, സുഭാഷ് ചന്ദ്രന് എന്നിവരും പങ്കെടുത്തു.
