കോട്ടയം : അടുത്ത അദ്ധ്യായന വര്ഷത്തിന് ഉത്സവച്ഛായയില് ഇന്ന് തുടക്കമാവും. മഴത്തുള്ളി കിലുക്കത്തിന്റെ അകമ്പടിയോടെയാണ് രണ്ട് മാസത്തെ വേനലവധിക്ക് ശേഷം വിദ്യാലയങ്ങള് തുറക്കുന്നത്.
പുതിയ കൂട്ടുകാരെ സ്വീകരിക്കാന് അക്ഷരമുറ്റങ്ങള് ഒരുങ്ങി. പ്രവശനോത്സവത്തോടെയാണ് ആദ്യാക്ഷരം നുകരാനെത്തുന്ന കുരുന്നുകളെ വരവേല്ക്കുന്നത്. ഇതിന്റെ ജില്ലാതല ഉദ്ഘാടനം ഇളമ്പള്ളി ഗവ.യുപിഎസില് രാവിലെ 9ന് ഡോ. എന്.ജയരാജ് എംഎല്എ നിര്വഹിക്കും. ജില്ലാപഞ്ചായത്ത് പ്രസിഡന്റ് സഖറിയാസ് കുതിരവേലി അദ്ധ്യക്ഷനാകും.
അക്ഷരജാഥയും വിളംബര ഘോഷയാത്രയും പ്രവശനോത്സവത്തിന് മ്ിഴിവാകും. ഇത്തവണ വിദ്യഭ്യാസ വകുപ്പ് പ്രവശനോത്സവസ്വാഗത ഗാനവും തയ്യാറാക്കിട്ടുണ്ട്.
ഒന്നാം ക്ലാസില് ഈ വര്ഷം 12,000 ത്തോളം കുട്ടികള് പ്രവേശനം നേടിയിട്ടുണ്ട്. ഇന്ന് ഒന്നേമുക്കാല് ലക്ഷം കൂട്ടികള് സ്്കൂളുകളിലെത്തും. ആറാം പ്രവൃത്തി ദിനമായ 8ന് ആണ് തലയെണ്ണല്.പ്രവശനോത്സവത്തിന്റെ ഭാഗമായി പുതിയതായി എത്തുന്ന കുട്ടികള്ക്ക് മധുരം നല്കി സ്വീകരിക്കും. പഠനോപകരണങ്ങളും നല്കുന്നുണ്ട്.
ജില്ലാതലത്തില് കൂടാതെ ഉപജില്ല, പഞ്ചായത്ത്, സ്കൂള് തലങ്ങളിലും പ്രവശനോത്സവം സംഘടിപ്പിച്ചിട്ടുണ്ട്. പിടിഎയും അദ്ധ്യാപകരും അഭ്യുദയകാംക്ഷികളും ചേര്ന്നാണ് സ്കൂളുകളില് പഠനോപകരണങ്ങളും മറ്റും നല്കുന്നത്. സ്കൂളുകള് ഇന്നലെ തന്നെ ഉത്സവച്ഛായയില് അലങ്കരിച്ച് ആകര്ഷകമാക്കിട്ടുണ്ട്. ചിത്രപ്പണികള് ചെയ്തും ബലൂണുകളും വര്ണ്ണക്കടലാസുകളും കെട്ടിയുമാണ് സ്കൂളുകള് അലങ്കരിച്ചത്.
ഈ വര്ഷം സ്കൂള് തുറക്കുന്നതിനൊപ്പം മഴയും എത്തിയതെന്നാണ് പ്രത്യേകത. മുന് വര്ഷങ്ങളില് സ്കൂള് തുറപ്പിന് ശേഷമായിരുന്നു ഇടവപ്പാതി എത്തിയത്. എന്നാല് ഈ വര്ഷം ഒരു ദിവസം മുമ്പേ മഴയെത്തി.
മാറ്റമില്ലാത്തതിനാല് 70 ശതമാനം പുസ്തകങ്ങളും സ്കൂളുകളില് എത്തിയെന്നാണ് വിദ്യാഭ്യാസ വകുപ്പ് അധികൃതര് പറയുന്നത്. എന്നാല് കാക്കനാട് സര്ക്കാര് പ്രസില് അച്ചടി പകുതിയായി കുറച്ചത് പുസ്തകങ്ങളുടെ ലഭ്യതയെ ബാധിച്ചിട്ടുണ്ട്.
