തൃപ്രയാര്: വലപ്പാട് ആനവിഴുങ്ങിയില് നിയന്ത്രണംവിട്ട കാറിടിച്ച് റോഡില് വീണ ബൈക്ക് യാത്രികനായ യുവാവ് കണ്ടെയ്നര് ലോറി കയറി മരിച്ചു. നാട്ടിക ബീച്ച് ഒന്പതാം വാര്ഡ് കോളനിക്ക് സമീപം നായരുശേരി രാജന്റെ മകന് അശ്വിനാണ് മരിച്ചത്. ചൊവ്വാഴ്ച രാത്രി ഏഴരയോടെ ആനവിഴുങ്ങി വടക്ക് ദേശീയപാതയിലായിരുന്നു അപകടം.
തൃപ്രയാര് തെക്കേ ആല്മാവിന് സമീപം പ്രവര്ത്തിക്കുന്ന ഹോണ്ട ഷോറൂമിലെ ജീവനക്കാരനാണ് അശ്വിന്. ഒപ്പം ജോലി ചെയ്യുന്ന സുഹൃത്തിനെ ചെന്ത്രാപ്പിന്നിയിലെ വീട്ടിലാക്കി മടങ്ങുന്നതിനിടെയാണ് അപകടത്തില്പ്പെട്ടത്. ആനവിഴുങ്ങിക്ക് വടക്ക്ഭാഗത്ത് വെച്ച് എതിരെ നിന്ന് നിയന്ത്രണം വിട്ടെത്തിയ കാര് അശ്വിന് സഞ്ചരിച്ച ബൈക്കില് ഇടിക്കുകയായിരുന്നു. ഇതോടെ തെന്നിമറിഞ്ഞ ബൈക്കില് നിന്ന് തെറിച്ചുവീണ അശ്വിന് എതിരെവന്ന കണ്ടെയ്നര് ലോറിക്കടിയില്പ്പെടുകയായിരുന്നു.
യുവാവിന്റെ തലയിലൂടെ ലോറി കയറിയിറങ്ങി. നിയന്ത്രണംവിട്ട കാര് കണ്ടെയ്നര് ലോറിയില് ഇടിച്ചാണ് നിന്നത്. അപകടത്തില് കാറിന്റെ ഒരുഭാഗവും,ലോറിയുടെ ഡീസല് ടാങ്കും ഭാഗികമായി തകര്ന്നു. അശ്വിന് സംഭവസ്ഥലത്ത് വെച്ചുതന്നെ മരിച്ചിരുന്നു. അപകടം നടന്നയുടന് കാര് യാത്രികര് ഓടിരക്ഷപ്പെട്ടു. യുവാവിന്റെ മൃതദേഹം ആക്ട്സ് പ്രവര്ത്തകര് വലപ്പാട് ആശുപത്രിയിലേക്ക് മാറ്റി.കാര് യാത്രികര് മദ്യലഹരിയിലായിരുന്നെന്ന് നാട്ടുകാര് പറഞ്ഞു.കാറില് നിന്ന് മദ്യകുപ്പിയും കണ്ടെത്തിയിട്ടുണ്ട്
