ഇന്ഡോര്: ഐപിഎല് പത്താം പതിപ്പിലെ ആദ്യ മത്സരത്തിനിറങ്ങിയ കിങ്സ് ഇലവന് പഞ്ചാബിന് ജയത്തുടക്കം. ഇന്നലെ നടന്ന പോരാട്ടത്തില് റൈസിങ് പൂനെ സൂപ്പര് ജയന്റിനെ 6 വിക്കറ്റുകള്ക്ക് തോല്പ്പിച്ചു.
ആദ്യം ബാറ്റ് ചെയ്ത പൂനെ 20 ഓവറില് ആറ് വിക്കറ്റ് നഷ്ടത്തില് 163 റണ്സെടുത്തപ്പോള് മറുപടി ബാറ്റിങ്ങിനിറങ്ങിയ കിങ്സ് ഇലവന് ഒരു ഓവര് ബാക്കിനില്ക്കേ നാല് വിക്കറ്റ് നഷ്ടപ്പെടുത്തി 164 റണ്സെടുത്തു. പൂനെക്ക് വേണ്ടി 50 റണ്സെടുത്ത ബെന് സ്റ്റോക്ക്സ് ടോപ്സ്കോറര്. മനോജ് തിവാരി 40 റണ്സെടുത്ത് പുറത്താകാതെ നിന്നു. പഞ്ചാബ് നിരയില് പുറത്താകാെത 44 റണ്സെടുത്ത ക്യാപ്റ്റന് ഗ്ലെന് മാക്സ്വെല്ലിന്റെയും 30 റണ്സെടുത്ത് പുറത്താകാതെ നിന്ന ഡേവിഡ്മില്ലറുടെയും കരുത്തിലാണ് വിജയം നേടിയത്. ആദ്യ മത്സരത്തില് മുംബൈ ഇന്ത്യന്സിനെ തോല്പ്പിച്ച പൂനെയുടെ ആദ്യ തോല്വിയാണിത്.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ പൂനെയുടെ തുടക്കം തകര്ച്ചയോടെയായിരുന്നു. ഒരുഘട്ടത്തില് നാലിന് 71 എന്ന നിലയില് തകര്ന്ന അവരെ കരകയറ്റിയത് ബെന്സ്റ്റോക്ക്സും മനോജ് തിവാരിയും ചേര്ന്നാണ്. 6.1 ഓവറില് 61 റണ്സാണ് ഇരുവരും അടിച്ചുകൂട്ടിയത്.
റണ്ണെടുക്കും മുമ്പ് മായങ്ക് അഗര്വാളിനെ കൂടാരം കയറ്റി പഞ്ചാബ് തുടക്കത്തിലെ ആധിപത്യം പുലര്ത്തി. ഓപ്പണര് അജിന്ക്യ രഹാനയ്ക്കും (19) നായകന് സ്റ്റീവന് സ്മിത്തിനും (26), ധോണിക്കും (5) മികച്ച ബാറ്റിങ് പുറത്തെടുക്കാന് കഴിഞ്ഞില്ല.നാല് ഓവറില് 33 റണ്സ് വഴങ്ങി 2 വിക്കറ്റ് വീഴ്ത്തിയ സന്ദീപ് ശര്മ്മ ബൗളിങില് തിളങ്ങി.
അക്ഷര് പട്ടേല്, ടി. നടരാജന്, മാര്ക്കസ് സ്റ്റോയിന്സ്, സ്വപ്നില് സിങ് എന്നിവര് ഓരോ വിക്കറ്റ് വീതം വീഴ്ത്തി. മറുപടി ബാറ്റിങ്ങിനിറങ്ങിയ പഞ്ചാബിനും തുടക്കത്തില് തിരച്ചടി നേരിട്ടു. 85 റണ്സെടുക്കുന്നതിനിടെ നാല് വിക്കറ്റുകള് നഷ്ടപ്പെട്ട അവരെ വിജയത്തിലേക്ക് നയിച്ചത് മാക്സ്വെല്ലും മില്ലറും ചേര്ന്ന അഞ്ചാം വിക്കറ്റ് കൂട്ടുകെട്ട്. 7.5 ഓവറില് 79 റണ്സാണ് ഇവര് അടിച്ചുകൂട്ടിയത്. ഹാഷിം ആംല (28), മനന് വോറ (14), വൃദ്ധിമാന് സാഹ (13), അക്ഷര് പട്ടേല് (24) എന്നിവാണ് കിങ്സ് ഇലവന് നിരയില് പുറത്തായത്. പൂനെക്ക് വേണ്ടി ഇമ്രാന് താഹിര് രണ്ട് വിക്കറ്റ് വീഴ്ത്തി. പഞ്ചാബ് നായകന് ഗ്ലെന് മാക്സ്വെല്ലാണ് മാന് ഓഫ് ദി മാച്ച്.
