മുണ്ടക്കയം: ടൗണിലെ ഗതാഗതകുരുക്ക് ഒഴിവാക്കുവാന് സര്വ്വകക്ഷിയോഗം ചേര്ന്ന് എടുത്ത തീരുമാനങ്ങള് പ്രാബല്യത്തില് വന്നു.
ഇതേ തുടര്ന്ന് വളരെയേറെ തിരക്കുള്ള ശനിയാഴ്ച്ച ദിവസംപോലും ഗതാഗതകുരുക്കുണ്ടായിരുന്നില്ല. ടൗണിലെ അനധികൃത പാര്ക്കിങിനെതിരെ പൊലീസ് നടപടി സ്വീകരിച്ചതോടെയാണ് ഗതാഗതകുരുക്കിന് പരിഹാരമായത്.
പഞ്ചായത്തിന്റെ പെര്മിറ്റ് ലഭിക്കാത്ത ഓട്ടോറിക്ഷകള് ടൗണില് സ്റ്റാന്റില് കിടന്ന് ഓടാന് പറ്റില്ലെന്നും അത്തരത്തിലുള്ള ഓട്ടോകള് പിടിച്ചെടുക്കുവാനും സര്വ്വകക്ഷിയോഗം തീരുമാനിച്ചിരുന്നു. ടൗണില് ഓട്ടോറിക്ഷയുടെ ബാഹുല്യം മൂലം ഉണ്ടാകുന്ന ഗതാഗത പരിഷ്കരണം പരിഹരിക്കുവാനായിരുന്നു ഈ തീരുമാനം. മുണ്ടക്കയം ടൗണില് മറ്റു സ്ഥലങ്ങളില് നിന്നും എത്തി സര്വ്വീസ് നടത്തിയ ഓട്ടോറിക്ഷകളുടെ എണ്ണം പെരുകിയത് ഗതാഗത പ്രശ്നങ്ങള്ക്ക് കാരണമായിരുന്നു. ടൗണില് ദേശീയപാതയ്ക്കരികിലാണ് മൂന്ന് ഓട്ടോ സ്റ്റാന്റുകള് സ്ഥിതിചെയ്യുന്നത്. അതിനാലാണ് ഓട്ടോകളുടെ ബാഹുല്യം ക്രമപ്പെടുത്തുവാന് സര്വ്വകക്ഷിയോഗം ഇത്തരത്തില് തീരുമാനം എടുത്തത്. എന്നാല് വര്ഷങ്ങള്ക്ക് മുന്പ് നല്കിയ പെര്മിറ്റുകളില് പലതും നിലവില് ഇല്ലെന്നും. ഒരു പെര്മിറ്റ് നമ്പറില് തന്നെ രണ്ട് ഓട്ടോറിക്ഷകള് വരെ സര്വ്വീസ് നടത്തുന്നുണ്ടെന്നും പരാതിയുണ്ട്. ഇതിനായി പെര്മിറ്റ് പരിശോധന നടത്തി ക്രമക്കേടുകള് കണ്ടെത്തുവാനും അധികൃതര് ശ്രമം തുടങ്ങി.
മുണ്ടക്കയം കല്ലേപ്പാലം മുതല് വൈ.എം.സി.എ വരെ പാതയോരങ്ങളില് അനധികൃത പാര്ക്കിങ് നടത്തുന്നതായിരുന്നു മറ്റൊരു പ്രധാന പ്രശ്നം. പെറ്റികേസുമായി പൊലീസ് പിന്നാലെ എത്തിയതോടെ ഇവിടുത്തെയും പ്രശ്നം താത്കാലികമായി നിലച്ചിട്ടുണ്ട്. മുണ്ടക്കയത്ത് സര്ക്കാര് തീരുമാനമനുസരിച്ചു പൂട്ടുകയും പിന്നീട് എരുമേലിയില് നിന്നും ഇങ്ങോട്ടു മാറ്റുകയും ചെയ്ത ബീവറേജ് ഔട്ലറ്റിന്റെ കടന്നുവരവാണ് ഇപ്പോഴത്തെ തിരക്കിനു പ്രധാനകാരണത്തിനിടയാക്കിയത്.
