കോഴിക്കോട്: മുഖ്യമന്ത്രിയെ കാണുന്നുണ്ടെങ്കില് ആങ്ങളയുടെ കൈപിടിച്ചുകൊണ്ട് മാത്രമെന്ന് മഹിജ. ഇന്നലെ തിരുവനന്തപുരത്ത് നിന്ന് കോഴിക്കോട്ട് റെയില്വെ സ്റ്റേഷനില് ഇറങ്ങിയതിന് ശേഷം മാധ്യമങ്ങളോട് സംസാരിക്കുകയായിരുന്നു പാമ്പാടി നെഹ്റു കോളജില് മരണപ്പെട്ട ജിഷ്ണു പ്രണോയിയുടെ അമ്മ.
”ഇതുവരെ എല്ലാറ്റിനും കൈപിടിച്ച് കൂടെയുണ്ടായിരുന്നത് എന്റെ പൊന്നാങ്ങള ശ്രീജിത്ത് മാത്രമാണ്. ഇനിയും ഈ ആങ്ങളയുടെ കൈപിടിച്ചുമാത്രമാണ് ജിഷ്ണു പ്രണോയിയുടെ കാര്യത്തിന് പോവുക. കരാര് വ്യവസ്ഥകള് മുഖ്യമന്ത്രി മുഖവിലയ്ക്കെടുക്കുമെങ്കില്, ആരോഗ്യസ്ഥിതി അനുവദിക്കുമെങ്കില് മുഖ്യമന്ത്രിയെ കാണും- അവര് പറഞ്ഞു. ശ്രീജിത്തിനെ ആരെങ്കിലും സ്വാധീനിച്ചോ എന്ന ചോദ്യത്തിന് ആരും സ്വാധീനിച്ചിട്ടില്ലെന്നും പെങ്ങളുടെ വലയത്തില് മാത്രമാണ് ശ്രീജിത്ത് ഉള്ളതെന്നും അവര് പറഞ്ഞു.
സഹോദരന് കെ.കെ.ശ്രീജിത്ത്, ഭര്ത്താവ് അശോകന്, ബന്ധു കെ.പി ശോഭ എന്നിവരോടൊപ്പമാണ് ഇന്നലെ വൈകീട്ട് 5.45 ഓടെ കൊച്ചുവേളി അമൃത്സര് എക്സപ്രസ് ട്രെയിനില് മഹിജ കോഴിക്കോട്ടെത്തിയത്. പിതൃസഹോദരന് കോരമ്പത്ത് നാണു മാലയിട്ടു സ്വീകരിച്ചു.
സഹോദരന്മാരായ റിജേഷ് കോരമ്പത്ത്, കെ.കെ.വിജിത്ത് എന്നിവരെ കൂടാതെ പി.കെ. ശങ്കരന്, പി.പി. പുരുഷോത്തമന്, കൃഷ്ണന് കെ.പി, വി.പി.സുനില് കുമാര്, ശ്രീജേഷ് കെ.ടി, വസന്ത കെ.പി, ശോഭ കെ.പി എന്നിവരാണ് മഹിജയെയും ബന്ധുക്കളെയും സ്വീകരിക്കാന് റെയില് വേസ്റ്റേഷനില് എത്തിയത്. ഇന്നലെ രാത്രി എട്ടോടെ വളയം പൂവംവയലില് എത്തിയ മഹിജയെയും കുടുംബത്തെയും നാട്ടുകാര് സ്വീകരിച്ചു.
