ആലപ്പുഴ: അംഗപരിമിതര്ക്ക് സര്ക്കാര് നല്കുന്ന വികലാംഗ പെന്ഷന് കുടിശിക വരുത്താതെ സമയാസമയം നല്കണമെന്ന് സംസ്ഥാന മനുഷ്യാവകാശ കമ്മീഷന്. പട്ടണക്കാട് സ്വദേശിനി സുഷമ നല്കിയ പരാതിയിലാണ് നടപടി.
2016ലെ ഓണം, ക്രിസ്തുമസ് കാലത്ത് ലഭിക്കേണ്ടിയിരുന്ന പെന്ഷന് ഇതുവരെ ലഭിച്ചില്ലെന്ന് പരാതിയില് പറയുന്നു. കുടിശിക അടിയന്തരമായി നല്കണമെന്ന് കമ്മീഷന് ആക്റ്റിങ് അദ്ധ്യക്ഷന് പി.മോഹനദാസ് പട്ടണക്കാട് ഗ്രാമപഞ്ചായത്ത് സെക്രട്ടറിക്ക് നിര്ദ്ദേശം നല്കി.
സര്വീസ് സഹകരണ ബാങ്കിലെ ബൈലോ പുതുക്കിയ വിവരം അറിയാതെ അംഗത്വം പുതുക്കാതിരുന്ന വീട്ടമ്മക്ക് അംഗത്വം പുതുക്കി നല്കാന് കമ്മീഷന് മറ്റൊരു പരാതിയില് കുമാരപുരം സര്വീസ് സഹകരണ ബാങ്കിന് നിര്ദ്ദേശം നല്കി.20 വര്ഷമായി ബാങ്കില് അംഗമായിരുന്ന ജെ.ഗീതമ്മ സമര്പ്പിച്ച പരാതിയിലാണ് ഉത്തരവ്.
ഗീതമ്മക്ക് 10 രൂപയുടെ ഓഹരി മാത്രമാണുണ്ടായിരുന്നത്. അത് 50 രൂപയാക്കി ഉയര്ത്തിയ വിവരം അറിഞ്ഞില്ല. തുടര്ന്ന് അംഗത്വം റദ്ദായി. ബാങ്കിന്റെ പരിധി പുനര്നിര്ണയം ചെയ്തതായും ബാങ്ക് കമ്മീഷനെ അറിയിച്ചു. ബാങ്കിന്റെ പ്രവര്ത്തന പരിധി പുനര്നിര്ണയം ചെയ്താല് നിലവിലെ അംഗത്വം ഒഴിവാക്കുമെന്നത് ശരിയായ പ്രവണതയല്ലെന്നും കമ്മീഷന് നിരീക്ഷിച്ചു.
കമ്മീഷന് സിറ്റിങ് ഇന്ന്
ആലപ്പുഴ : സംസ്ഥാന മനുഷ്യാവകാശ കമ്മീഷന് ആക്റ്റിങ് ചെയര്മാന് പി. മോഹനദാസ് ഇന്ന് രാവിലെ 11 ന് ആലപ്പുഴ ഗവ. ഗസ്റ്റ് ഹൗസില് സിറ്റിങ് നടത്തുമെന്ന് കമ്മീഷന് അറിയിച്ചു.
