ബി.കെ.ശേഖര് മാധ്യമ പുരസ്കാരം മാധ്യമ നിരൂപകന് ടി.ജി.മോഹന്ദാസിനും പൊതു പ്രവര്ത്തനത്തിനുള്ള പുരസ്കാരം കെ.രാമന്പിള്ളയ്ക്കും കെപിസിസി ജനറല് സെക്രട്ടറി ശരത്ചന്ദ്ര പ്രസാദ് സമ്മാനിച്ചപ്പോള്. ബിജെപി ജില്ലാ പ്രസിഡന്റ് അഡ്വ.എസ്. സുരേഷ്, വക്താവ് അഡ്വ.ജെ.ആര്. പത്മകുമാര്, എന്നിവര് സമീപം
തിരുവനന്തപുരം: ബിജെപി നേതാവായിരുന്ന ബി.കെ. ശേഖറിന്റെ പേരിലുള്ള പുരസ്കാരങ്ങള് സമ്മാനിച്ചു. ബി.കെ.ശേഖര് ഫൗണ്ടേഷന് സംഘടിപ്പിച്ച ആറാം അനുസ്മരണ ചടങ്ങില് മാധ്യമ പുരസ്കാരം മാധ്യമ നിരൂപകന് ടി.ജി.മോഹന്ദാസിനും പൊതു പ്രവര്ത്തനത്തിനുള്ള പുരസ്കാരം കെ.രാമന്പിള്ളയ്ക്കും കെപിസിസി ജനറല് സെക്രട്ടറി ശരത്ചന്ദ്രപസാദ് സമ്മാനിച്ചു.
തിരുവനന്തപുരത്ത് നിറസാന്നിദ്ധ്യമായിരുന്ന ബി.കെ.ശേഖര് തെരഞ്ഞെടുപ്പില് മത്സരരംഗത്തേക്ക് എത്തിയപ്പോള് കോണ്ഗ്രസ് പാളയത്തില് ആശങ്ക ഉയര്ന്നിരുന്നുവെന്നും അത്രയും വ്യക്തിപ്രഭാവമുള്ള നേതാവായിരുന്നു ശേഖറെന്നും ശരത്ചന്ദ്രപ്രസാദ് അനുസ്മരിച്ചു.
പൊതുപ്രവര്ത്തന രംഗത്ത് വ്യക്തമായ കാഴ്ചപ്പാടും ആദര്ശവും വച്ചുപുലര്ത്തിയ നേതാവായിരുന്നു ബി.കെ.ശേഖറെന്ന് കെ.രാമന്പിള്ള പറഞ്ഞു. കൃത്യമായ ദിശാബോധവും കൃത്യനിഷ്ഠയും ജീവിതത്തിലും രാഷ്ട്രീയത്തിലും പിന്തുടര്ന്നിരുന്ന ശേഖര് യുവാക്കളെ പാര്ട്ടിയിലേക്ക് എത്തിക്കാന് കഠിന പരിശ്രമം നടത്തിയിരുന്നെന്നും രാമന്പിള്ള പറഞ്ഞു.
ബിജെപി തിരുവനന്തപുരം ജില്ലയിലെ നിര്ണ്ണായക ശക്തിയായി മാറിയതാണ് ബി.കെ.ശേഖറിന്റെ സ്മരണയക്ക് മുമ്പിലുള്ള ബാഷ്പാഞ്ജലിയെന്ന് ബിജെപി വക്താവ് അഡ്വ.ജെ.ആര് പത്മകുമാര് പറഞ്ഞു. ബി.കെ.ശേഖര് ഫൗണ്ടേഷന് പ്രസിഡന്റ് തോപ്പില് ദിലീപ് അദ്ധ്യക്ഷനായിരുന്നു. ബിജെപി ജില്ലാ പ്രസിഡന്റ് അഡ്വ.എസ്.സുരേഷ്, ഫൗണ്ടേഷന് സെക്രട്ടറി ബി.ശങ്കര്, റോയി കൈലാസ് തുടങ്ങിയവര് സംസാരിച്ചു.
