പൂച്ചാക്കല്: അഞ്ഞൂറ് രൂപയുടെ കള്ളനോട്ടുകള് പ്രചരിക്കുന്നു. തൈക്കാട്ടുശേരി, ചീരാത്തുകാട്, പൂച്ചാക്കല്, പാണാവള്ളി എന്നിവിടങ്ങളിലാണ് വ്യാപകമായി കള്ളനോട്ട് പ്രചരിക്കുന്നത്.
പെട്രോള് പമ്പുകള്, ബിവറേജ് മദ്യവില്പ്പനശാല, മരുന്ന്, പലചരക്ക് കടകള് എന്നിവിടങ്ങളിലും കെട്ടിട നിര്മാണ മേഖലയിലുമാണ് കള്ളനോട്ടുകള് വ്യാപകമാകുന്നത്. കഴിഞ്ഞ ദിവസം ചീരാത്തുകാട്ടിലെ മദ്യവില്പ്പന ശാലയില് മദ്യം വാങ്ങാന് എത്തിയ യുവാവില് നിന്ന് 500 രൂപയുടെ കള്ളനോട്ട് കണ്ടെത്തിയിരുന്നു.
സ്ഥാപന അധികാരികള് അറിയിച്ചതിനെ തുടര്ന്ന് പൂച്ചാക്കല് പോലീസ് എത്തി യുവാവിനെ കസ്റ്റഡിയില് എടുത്ത് ചോദ്യം ചെയ്തു. ജോലി സ്ഥലത്ത് നിന്ന് ലഭിച്ചന്നായിരുന്നു മറുപടി. തൊഴിലുടമയെ വരുത്തി ചോദ്യം ചെയ്തപ്പോള് ബാങ്കില് നിന്നാണ് ലഭിച്ചതെന്നാണ് ഇയാള് പറഞ്ഞത്. നിലവിലെ നോട്ടിനെക്കാള് കട്ടി കുറഞ്ഞവയാണ് പ്രചരിക്കുന്നത്.
രണ്ട് പാളികള് ഉള്ളവയാണ് നോട്ടുകള്. ഒറ്റനോട്ടത്തില് തിരിച്ചറിയാന് കഴിയാത്ത സ്ഥിതിയാണ്. കള്ളനോട്ട് ലഭിക്കുന്ന സാധാരണക്കാര് ബാങ്കുകളില് എത്തുമ്പോഴാണ് വിവരമറിയുന്നത്. സ്പെഷ്യല് ബ്രാഞ്ച് പോലീസ് അടക്കം രഹസ്യമായി അന്വേഷണം ആരംഭിച്ചതായാണ് വിവരം.
