ആലപ്പുഴ: പത്തനംതിട്ട, ആലപ്പുഴ ജില്ലകളിലൂടെയൊഴുകിയിരുന്നതും നീരൊഴുക്കു നിലച്ച് നാശോന്മുഖവുമായ വരട്ടാറിനെ പുനരൂജ്ജീവിപ്പിക്കാന് ഹരിതകേരളം മിഷന് പദ്ധതിയൊരുക്കും.
മന്ത്രിമാരായ മാത്യു ടി. തോമസ്, ഇ. ചന്ദ്രശേഖരന്, ഡോ. ടി.എം. തോമസ് ഐസക് എന്നിവര് പങ്കെടുത്ത യോഗത്തിലാണ് തീരുമാനം. 29ന് വരട്ടാറിലൂടെ നടന്ന് പുനരുജ്ജീവനപ്രവര്ത്തനങ്ങള്മന്ത്രി ഡോ. ടി.എം. തോമസ് ഐസക് ഉദ്ഘാടനം ചെയ്യും.
റവന്യൂ മന്ത്രി ഇ. ചന്ദ്രശേഖരന് അദ്ധ്യക്ഷത വഹിക്കും. കയ്യേറ്റങ്ങളൊഴിപ്പിച്ച് വരട്ടാറിനെ സ്വാഭാവിക നീരൊഴുക്കുള്ള നദിയാക്കി മാറ്റാന് ജനങ്ങള് ഒത്തുചേരണമെന്ന് റവന്യൂമന്ത്രി ഇ. ചന്ദ്രശേഖരന് പറഞ്ഞു.
ചെങ്ങന്നൂര്, ആറന്മുള, തിരുവല്ല നിയോജക മണ്ഡലങ്ങളില്കൂടി ഒഴുകുന്ന വരട്ടാര് പമ്പയാറ്റിലെ അധികജലം വഴിമാറ്റി മണിമലയിലെത്തിക്കുന്ന സ്വാഭാവിക നദിയാണ്. 509 ഹെക്ടര് പാടശേഖരങ്ങള്ക്കും 2000 ഹെക്ടര് മറ്റു കൃഷികള്ക്കും ജലസേചനം നല്കിയിരുന്ന സ്വാഭാവിക ജലാശായമാണത്.
311 മീറ്റര് വരെ വീതിയുണ്ടായിരുന്ന ഈ നദി പലയിടങ്ങളിലും അനധികൃത കയ്യേറ്റങ്ങളാല് 13 മീറ്ററില് താഴെ വീതിയിലേക്ക് ചുരുങ്ങിയിട്ടുണ്ട്. അശാസ്ത്രീയ നിര്മിതികളും അനധികൃത കയ്യേറ്റങ്ങളും ഒഴിവാക്കി വരട്ടാറിനെ പഴയതുപോലെയാക്കാന് തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ പദ്ധതികളാവിഷ്കരിക്കാന് യോഗം തീരുമാനിച്ചു.
