പള്ളുരുത്തി: കൊച്ചി നഗരസഭ വക തോപ്പുംപടി കഴുത്തു മുട്ടിലെ വ്യവസായ കേന്ദ്രത്തില് കോടികള് വിലമതിക്കുന്ന യന്ത്രങ്ങള് തുരുമ്പെടുത്തു നശിക്കുന്നു.
ജനകീയാസൂത്രണ പദ്ധതി പ്രകാരം നിര്ധനരായവര്ക്ക് ജീവിത മാര്ഗ്ഗം എന്ന നിലയില് പേപ്പര് ബാഗ് നിര്മ്മാണം, പ്രിന്ഡിംഗ് തുടങ്ങി വിവിധ തൊഴിലുകള്ചെയ്യുന്നതിനായി ഒരുക്കിയ യന്ത്രസാമഗ്രികകളാണ് തുരുമ്പെടുത്തു നശിക്കുന്നത്.
വ്യവസായ കേന്ദ്രം ഉദ്ഘാടനം ചെയ്ത് മാസങ്ങള് മാത്രം പ്രവര്ത്തിച്ചപ്പോഴേക്കും സ്ഥാപനത്തിന് താഴ് വീണു. ഇതിനിടയില് സ്ത്രീകള്ക്ക് തൊഴിലവസരത്തിനായി കേന്ദ്രത്തില് ഇട്ടിരുന്ന ഇരുപത്തിയഞ്ചോളം വരുന്ന തയ്യല് മെഷീനുകള് കടത്തികൊണ്ടു പോയതായി സമീപവാസികള് ആരോപിക്കുന്നു.
കേന്ദ്രം തുറക്കണമെന്ന് ആവശ്യം ഉയര്ന്നെങ്കിലും നഗരസഭ മൗനം പാലിക്കുകയാണ്.
രണ്ടു വര്ഷം മുന്പ് ടോണി ചമ്മിണി മേയറായിരിക്കെ കേന്ദ്രത്തിന് സമീപം ബഡ്സ് സ്കൂള് തുറന്നുവെങ്കിലും പ്രവര്ത്തനം ഏതാണ്ട് നിലച്ച മട്ടാണ്.
ഒരു പദ്ധതി തുടങ്ങുവാന് കാണിക്കുന്ന ആവേശം പദ്ധതി തുടര്ന്നു കൊണ്ടുപോകാന് കാണിക്കുന്നില്ലായെന്നാണ് ആക്ഷേപം.
കോടികള് വിലമതിക്കുന്ന യന്ത്രസാമഗ്രികകള് തുരുമ്പെടുക്കുന്ന സംഭവത്തില് ബന്ധപ്പെട്ട ഉദ്യേഗസ്ഥര്ക്കും, ജനപ്രതിനിധികള്ക്കുമെതിരെ നിയമ നടപടി സ്വീകരിക്കണമെന്ന് നാട്ടുകാര് ആവശ്യപ്പെട്ടു.
