ഉനദ്ഘട്ടിന്റെ ഹാട്രിക്കില്‍ ഹൈദരാബാദ് വീണു

ഹൈദരാബാദ്: ഹാട്രിക്ക് ഉള്‍പ്പെടെ അഞ്ചുവിക്കറ്റ് കൊയ്‌തെടുത്ത് ജയ്‌ദേവ് ഉനദ്ഘട്ട് റൈസിംഗ് പൂനെ സൂപ്പര്‍ജയന്റ്‌സിന് വിജയമൊരുക്കി. ഐപിഎല്ലിലെ ആവേശഭരിതമായ പോരാട്ടത്തില്‍ അവര്‍ നിലവിലുളള ചാമ്പ്യന്മാരായ സണ്‍റൈസേഴ്‌സ് ഹൈദരാബാദിനെ പന്ത്രണ്ട് റണ്‍സിന് തോല്‍പ്പിച്ചു. ഈവിജയത്തോടെ 16 പോയിന്റുമായി പൂനെ രണ്ടാം സ്ഥാനത്തെത്തി. പൂനെ നിശ്ചിത 20 ഓവറില്‍ എട്ടു വിക്കറ്റിന് 148 റണ്‍സെടുത്തപ്പോള്‍ ഹൈദരാബാദിന്റെ മറുപടി ഒമ്പതു വിക്കറ്റിന് 136 റണ്‍സിലൊതുങ്ങി.

അവസാന ഓവറിലെ 2,3,4 പന്തുകളില്‍ ബിപുല്‍ ശര്‍മ(8), റാഷിദ് ഖാന്‍(3), ഭുവനേശ്വര്‍ കുമാര്‍ (0) എന്നിവരെ പുറത്താക്കിയാണ് ഉനദ്ഘട്ട് ഹാട്രിക്ക് തികച്ചത്. ഈ സീസണിലെ മൂന്നാമത്തെ ഹാട്രിക്കാണിത്. സാമുവല്‍ ബദ്രി, ആന്‍ഡ്രൂ ടൈ എന്നിവരാണ് ഹാട്രിക്ക് കുറിച്ച മറ്റ് ബൗര്‍മാര്‍.

നാല് ഓവറില്‍ മുപ്പതു റണ്‍സിന് അഞ്ചുവിക്കറ്റ് വീഴ്‌ത്തിയ ഉനദ്ഘട്ടാണ് കളിയിലെ കേമന്‍.

ടോസ് നഷ്ടപ്പെട്ട് ബാറ്റ് ചെയ്ത പൂനെ ഓള്‍ റൗണ്ടര്‍ ബെന്‍ സ്‌റ്റോക്ക്‌സ് (39), ക്യാപ്റ്റന്‍ സ്മിത്ത് (34) ധോണി (31) എന്നിവരുടെ മികവിലാണ് 148 റണ്‍സ് എടുത്തത്.

പൂനെയുടെ തുടക്കം തകര്‍ന്നു. ഓപ്പണര്‍ ത്രിപാഠി ഒരുറണ്‍സിന് പുറത്തായി. ക്യാപ്റ്റന്‍ സ്മിത്തും രഹാനെയും പിടിച്ചുനിന്ന് സ്‌കോര്‍ ഉയര്‍ത്തി. ഇവര്‍ 33 റണ്‍സ് കൂട്ടിചേര്‍ത്തു.പിന്നീടെത്തിയ സ്‌റ്റോക്‌സ് അടിച്ചു തകര്‍ത്തു. 25 പന്തില്‍ ഒരു ഫോറും മൂന്ന് സിക്‌സറും പൊക്കി 39 റണ്‍സോടെ ടോപ്പ് സ്‌കോററായി. മൂന്നാം വിക്കറ്റില്‍ ഇവര്‍ അറുപതു റണ്‍സ് അടിച്ചെടുത്തു. പിന്നീടെത്തയ ധോണിയും പൊരുതിയതോടെയാണ് സ്‌കോര്‍ 148 റണ്‍സിലെത്തിയത്. ധോണി 21 പന്തില്‍ രണ്ടു ഫോറും രണ്ട് സിക്‌സറും അടിച്ചു.

ഹൈദരാബാദിനു വേണ്ടി സിദ്ധാര്‍ത്ഥ് കൗള്‍ നാല് ഓവറില്‍ 29 റണ്‍സിന് നാലു വിക്കറ്റെടുത്തു.

ചെറിയവിജയലക്ഷ്യത്തിനായി മറുപടി പറഞ്ഞ ഹൈദരാബാദിന്റെ തുടക്കം മോശമായില്ല. വാര്‍ണറും ധവാനും ആദ്യ വിക്കറ്റില്‍ 25 റണ്‍സ് അടിച്ചെടുത്തു. ധവാനു (19) പിറകെ വില്ല്യംസണും (4) പുറത്തായി. തുടര്‍ന്നെത്തിയ യുവരാജ് വാര്‍ണര്‍ക്കൊപ്പം പിടിച്ചു നിന്ന് സ്‌കോര്‍ ഉയര്‍ത്തി. വാര്‍ണറും (40) യുവരാജും (47) പുറത്തായതൊടെ ഹൈദരാബാദിന്റെ പ്രതീക്ഷ തകര്‍ന്നു. വാലറ്റനിര പൂനെയുടെ ജയ്ദേവ് ഉനദ്ഘട്ടിന് മുന്നില്‍ തകര്‍ന്നു.