ചേര്ത്തല: മകന്റെ ഓര്മകളില് വിതുമ്പി അശോകനും നിര്മ്മലയും. ആശ്വാസവുമായി ബിജെപി മുന് സംസ്ഥാന അദ്ധ്യക്ഷന് വി. മുരളീധരന്. ഉത്സവത്തിനിടെയുണ്ടായ സംഘര്ഷത്തില് കൊല്ലപ്പെട്ട പ്ലസ്ടു വിദ്യാര്ത്ഥി പട്ടണക്കാട് പഞ്ചായത്ത് പത്താം വാര്ഡില് കളപ്പുരയ്ക്കല് നികര്ത്തില് അനന്ദു(17)വിന്റെ മാതാപിതാക്കളെയും സഹോദരിയെയും കാണാനാണ് വി. മുരളീധരന് എത്തിയത്.
അദ്ദേഹം മാതാപിതാക്കളും ബന്ധുക്കളുമായി സംസാരിച്ചു. സഹോദരനോടെന്ന പോലെയാണ് അവര് മുരളീധരനോട് വിഷമങ്ങള് പങ്കുവെച്ചത്. രാഷ്ട്രീയ മുതലെടുപ്പിനായി പ്രദേശത്ത് വെച്ചിരിക്കുന്ന ഫ്ളക്സുകളില് അനന്തുവിന്റെ ഫോട്ടോ കാണുമ്പോള് ജോലിക്കുപോകാന് പോലും കഴിയുന്നില്ലെന്ന് അശോകന് പറഞ്ഞു.
ഓര്മവച്ച നാള് മുതല് രാഷ്ട്രീയ സ്വയം സേവകസംഘത്തിന്റെ പ്രവര്ത്തകരാണ് താനും കുടുംബവും. ഇപ്പോഴും അതില് തന്നെ ഉറച്ചുനില്ക്കുകയാണ്. കഴിഞ്ഞ ആറിനായിരുന്നു സംഭവം.
വയലാര് കവലയ്ക്ക് സമീപത്തെ ക്ഷേത്ര ഉത്സവത്തിനിടെയാണ് സംഘര്ഷം ഉണ്ടായത്. വയലാര് രാമവര്മ മെമ്മോറിയല് ഗവ. ഹയര് സെക്കന്ഡറി സ്കൂളിലെ വിദ്യാര്ത്ഥിയായിരുന്നു അനന്ദു. പ്ലസ്ടു പരീക്ഷ കഴിഞ്ഞ് റിസള്ട്ടിനായി കാത്തിരിക്കുന്നതിനിടയിലാണ് അനിഷ്ടസംഭവങ്ങള് ഉണ്ടായത്.
രാഷ്ട്രീയസംഘട്ടനമല്ലെന്ന് പോലീസ് നേരത്തെ വ്യക്തമാക്കിയിരുന്നു. ബിജെപി ചേര്ത്തല നിയോജകമണ്ഡലം പ്രസിഡന്റ് സാനു സുധീന്ദ്രന്, ജനറല് സെക്രട്ടറി അരുണ്. കെ. പണിക്കര്, അഭിലാഷ് മാപ്പറമ്പില്, ബൈജു അന്ധകാരനഴി, ആര്.ഡി. ഉണ്ണി, അരുണ്കുമാര്, എം. ജി. രഘുവരന്, വി. വി. നാരായണന് എന്നിവരും അദ്ദേഹത്തോടൊപ്പമുണ്ടായിരുന്നു.
