പേരൂര്ക്കട: സ്വാതന്ത്ര്യസമര പോരാട്ടത്തിലെ നിറ സാന്നിദ്ധ്യമായി ജയില്വാസം അനുഷ്ഠിച്ച സ്വാതന്ത്ര്യസമരസേനാനി തന്റെ ശിഷ്ടകാലം കഴിച്ച് കൂട്ടുന്നത് വൃദ്ധസദനത്തില്. വട്ടിയൂര്ക്കാവ് വയലിക്കട സ്വദേശി കാലടി കൃഷ്ണന് നായര് (95) ആണ് പുലയനാര്ക്കോട്ടയിലെ വൃദ്ധസദനത്തില് ഒരുവര്ഷമായി കഴിയുന്നത്. മക്കള് അന്വേഷിക്കാത്തതിനാലാണ് വൃദ്ധസദനത്തിലേക്ക് എത്തിപ്പെട്ടതെന്ന് കൃഷ്ണന് നായര് പറയുന്നു.
മക്കളില്നിന്ന് സഹായധനം ലഭിക്കണമെന്നാവശ്യപ്പെട്ട് ഇദ്ദേഹം മുന് കളക്ടര് ബിജുപ്രഭാകറിനെ സമീപിച്ചിരുന്നു. കളക്ടര് ഇടപെട്ടതോടെ നല്ലപദവിയിലിരിക്കുന്ന മകന് സഹായധനം കൃത്യമായി ബാങ്ക് അക്കൗണ്ടില് നല്കിത്തുടങ്ങി. എന്നാല് ഇതിന്റെ വാശിയില് തന്നെ മക്കള് അന്വേഷിക്കാതായതോടെ ഇദ്ദേഹം വീണ്ടും കളക്ടറെ സമീപിക്കുകയും കളക്ടറുടെ നിര്ദ്ദേശപ്രകാരം വൃദ്ധസദനത്തില് കഴിയാനുള്ള സൗകര്യം ഉണ്ടാക്കി കൊടുത്തു.
വൃദ്ധസദനത്തില് ഒരുവര്ഷം കടന്നുപോയതോടെ തന്റെ ജന്മദിനമറിയിച്ചുകൊണ്ട് കൃഷ്ണന് നായര് സഹപ്രവര്ത്തകരെ വിളിച്ചു. അപ്പോഴാണ് അവര് ഇക്കാര്യം അറിയുന്നത്. ഏതായാലും തന്റെ ജന്മദിനം വൃദ്ധസദനത്തില് സഹപ്രവര്ത്തകര്ക്കും അന്തേവാസികള്ക്കുമൊപ്പം കൃഷ്ണന്നായര് ആഘോഷിച്ചു. വട്ടിയൂര്ക്കാവില് നടന്ന സ്വാതന്ത്ര്യസമര പോരാട്ടത്തിലാണ് കൃഷ്ണന്നായര് പോരാടിയത്. വൃദ്ധസദനത്തില് കഴിയുന്ന ഇദ്ദേഹത്തിന് ഒരു വിഷമമേയുള്ളൂ ശിഷ്ട കാലം ഉറ്റവരുമൊത്ത് കഴിയാനാകില്ലല്ലോയെന്നോര്ത്ത്.
