തിരുവനന്തപുരം: ചാക്കയില് ട്രാഫിക്ക് റൗണ്ട് ഹബ് പൊളിച്ചു മാറ്റി വികസനം. ഗതാഗത കുരുക്കില് മണിക്കൂറുകളോളം ജനം നട്ടം തിരിയുന്നു. ചാക്ക റൗണ്ട് ഹബില് നിന്നും അനായാസം വാഹനങ്ങള് കടന്നുപോയപ്പോയിരുന്ന സാഹചര്യം പരിഷ്കരണത്തിന്റെ പേരില് പൊളിച്ചു നീക്കിയതോടെ ചാക്കകടക്കല് എന്ന കടമ്പ ദുഷ്കരമായിരിക്കുകയാണ്.
ചാക്ക റൗണ്ടില് നിന്ന് ശംഖുമുഖം, ഈഞ്ചക്കല്, കഴക്കൂട്ടം, പേട്ട എന്നിവിടങ്ങളിലേക്ക് വാഹനങ്ങള്ക്ക് തിരിഞ്ഞു പോകാം. കൂടാതെ ടെക്നോപാര്ക്ക്, കോളേജുകള്, സ്കൂളുകള്, സ്വകാര്യ കമ്പനികള്, സര്ക്കാര് സ്ഥാപനങ്ങള് എന്നിവ ചാക്ക ജംഗ്ഷനെ കേന്ദ്രീകരിച്ചാണ് സ്ഥിതി ചെയ്യുന്നത്.
നിലവില് എതാനും വാഹനങ്ങള് കടന്നുപോകുമ്പോള് തന്നെ സിഗ്നല് മാറുന്നു. അതുകൊണ്ടുതന്നെ ഒരു ഭാഗത്തു നിന്നുള്ള വാഹനങ്ങള്ക്ക് സിഗ്നല് കടക്കാന് മുന്പത്തേക്കാള് മണിക്കൂറുകള് കാത്തു കിടക്കേണ്ടി വരുന്നു. വൈകുന്നേരങ്ങളില് ടെക്നോ പാര്ക്ക്, വിദ്യാഭ്യാസ സ്ഥാപനങ്ങള് എന്നിവയില് നിന്നും മടങ്ങുന്നവരും കൂടിയാകുമ്പോള് വന് ഗതാഗത കുരുക്കിനാണ് ചാക്ക സാക്ഷ്യം വഹിക്കുന്നത്.
പരാതികള് വര്ദ്ധിച്ചപ്പോള് പലപ്പോഴും ട്രാഫിക് സിഗ്നല് ഒഴിവാക്കി പോലീസ് നേരിട്ട് വാഹനങ്ങളെ നിയന്ത്രിക്കേണ്ട ഗതികേടിലാണ്. റോഡ് വികസനം നടക്കുന്നതിനാല് വാഹനങ്ങള്ക്ക് യഥേഷ്ടം കടന്നു പോകാന് പ്രയാസം അനുഭവപ്പെടുന്നുണ്ട്. അശാസ്ത്രീയമായ പരിഷ്കരണം വരുത്തുമ്പോള് ഇതിന്റെ ദോഷം പേറുന്നത് സാധാരണക്കാരായ ജനങ്ങളാണ്.
