ചങ്ങനാശേരി: അന്താരാഷ്ട്രസ്റ്റേഡിയം നിര്മ്മാണത്തിന് വേണ്ടി എടുത്ത സ്ഥലത്ത് മണ്ണിറക്കുന്നത് ഡിവൈഎഫ്ഐക്കാര് തടഞ്ഞു.എം.സി റോഡ് നവീകരണത്തിന്റെ ഭാഗമായി ലഭിക്കുന്ന മണ്ണ് സ്റ്റേഡിയം നിര്മ്മാണസ്ഥലത്ത് ഇറക്കുന്നതിന് കഴിഞ്ഞദിവസം നഗരസഭ വിളിച്ചുകൂട്ടിയ സര്വ്വകക്ഷിയോഗത്തില് ധാരണയായിരുന്നു.
ഇതിന്റെ അടിസ്ഥാനത്തില് മണ്ണുമായി എത്തിയ കെഎസ്ടിപി ലോറികളാണ് ഒരു സംഘം ഡിവൈഎഫ്ഐക്കാര് കൊടികുത്തി തടഞ്ഞത്. ഏതാനും ചില വ്യക്തികളുടെ ഗൂഢലക്ഷ്യങ്ങളാണ് സ്റ്റേഡിയത്തിന്റെ വികസന പ്രവര്ത്തനങ്ങള് തടസപ്പെടുത്തുന്നതിനു പിന്നിലെന്നാണ് ആക്ഷേപം. മണ്ണിടുന്നത് തടഞ്ഞ വിവരം കോണ്ട്രാക്ടര് സി.എഫ്.തോമസ് എംഎല്എയെ അറിയിക്കുകയും അദ്ദേഹം പേലീസിനോട് സംരക്ഷണം നല്കുന്നതിന് ആവശ്യപ്പെട്ട പ്രകാരം ഏതാനും പോലീസുകാര് അവിടെയെത്തിയെങ്കിലും മണ്ണിറക്കുന്നത് നടപടി ഉണ്ടായില്ല. പോലീസ് വിഷയത്തില് ഇടപെടാതെ നോക്കി നില്ക്കുകയായിരുന്നുവെന്നാണ് പരാതി. കഴിഞ്ഞ മാസത്തില് കൂടിയ സര്വ്വകക്ഷിയോഗം എം.സി.റോഡില് നിന്നും ലഭിക്കുന്ന മണ്ണ് സ്റ്റേഡിയത്തില് ഇറക്കുന്നതിന് അനുമതി നല്കിയിരുന്നു.അന്നും മണ്ണിറക്കുന്നത് തടയുകയും ലക്ഷങ്ങള് വിലവരുന്ന മണ്ണ് നഗരസഭയ്ക്ക് നഷ്ടപ്പെടുകയും ചെയ്തിരുന്നു. ഈ മണ്ണ് സ്വകാര്യ വ്യക്തികളുടെ പുരയിടത്തില് നിക്ഷേപിച്ചതായി കഴിഞ്ഞ ദിവസം കൂടിയ സര്വ്വകക്ഷി യോഗത്തില് മുനിസിപ്പല് ചെയര്മാന് ആക്ഷേപം ഉന്നയിച്ചിരുന്നു.എംഎല്എയും നഗര സഭയും ഇക്കാര്യത്തില് അടിയന്തിരമായി ഇടപെട്ട് സ്റ്റേഡിയത്തില് മണ്ണ് ഇടുന്നതിനുള്ള നടപടികള് സ്വീകരിക്കണമെന്നാണ് ആവശ്യം.
