ചേര്ത്തല: വൈകിയെത്തിയ ബോധോദയം, ശ്രീനാരായണ ഗുരുദേവന്റെ അപദാനങ്ങള് പാടിപ്പുകഴ്ത്തി സിപിഎം.
തണ്ണീര്മുക്കം പഞ്ചായത്തിന്റെ വിവിധ ഭാഗങ്ങളിലും, നഗരസഭയിലെ ചില വാര്ഡുകളിലുമാണ് ഗുരുദേവനെ കുറിച്ചുള്ള ലഘുലേഖകള് ഇറങ്ങിയത്. ഈഴവര് കൂടുതലുള്ള വാര്ഡുകളില് പാര്ട്ടി പ്രകടനപത്രികയോടൊപ്പമാണ് ലഘുലേഖകള് വിതരണം ചെയ്തിരിക്കുന്നത്. ഗുരുദേവ വചനങ്ങളും, ചിത്രങ്ങളും ഉള്പ്പെടുത്തിയിട്ടുള്ള ഇതില് കുമാരനാശാന് ഗുരുവിനെ കുറിച്ചെഴുതിയ കവിതയും ആലേഖനം ചെയ്തിട്ടുണ്ട്. ഇലപ്പിക്കുളം രവീന്ദ്രന് എന്നയാളുടെ പേരിലാണ് നോട്ടീസ് പ്രസിദ്ധീകരിച്ചിരിക്കുന്നത്.
ശ്രീനാരായണ ഗുരുദേവന്റെ മഹത്തായ ആശയങ്ങളുടെ സംരക്ഷണത്തിനായി ഇടതുപക്ഷത്തോടൊപ്പം അണിചേരണമെന്ന രസകരമായ തത്വത്തോടെയാണ് ലഘുലേഖ സമാപിക്കുന്നത്. ഗുരുവിന്റെ കഴുത്തില് കയറിട്ടു വലിച്ചതും, അതിനെ ന്യായീകരിച്ചതും സാധാരണക്കാരായ ഈഴവര്ക്കിടയില് കടുത്ത എതിര്പ്പ് ഉണ്ടാക്കിയിരുന്നു. പല ഈഴവ കുടുംബങ്ങളിലേക്കും വോട്ട് ചോദിച്ച് സിപിഎമ്മിന് കടക്കുവാന് കഴിയാത്ത അവസ്ഥ വന്നു.
ഇതിനെ മറികടക്കാന് പുതിയ അടവുകള് പയറ്റുകയാണ് പാര്ട്ടി നേതൃത്വം. അച്ചടിച്ച പ്രസിന്റെ പേരോ കോപ്പികളോ രേഖപ്പെടുത്താത്ത ലഘുലേഖയ്ക്കെതിരെ പരാതി നല്കുവാനുള്ള തയ്യാറെടുപ്പിലാണ് മറ്റ് രാഷ്ട്രീയ പാര്ട്ടികള്.
