മെല്ബണ്: വിജയങ്ങളില് ഇന്ത്യന് ക്യാപ്റ്റന് മഹേന്ദ്രസിംഗ് ധോണിക്ക് സെഞ്ചുറി. ഇന്നലെ ബംഗ്ലാദേശിനെ കീഴടക്കിയതോടെയാണ് ധോണി ക്യാപ്റ്റനെന്ന നിലയില് 100 വിജയങ്ങള് തികച്ചത്. 2007 മുതല് ഇന്ത്യന് ടീമിനെ നയിക്കുന്ന ധോണി 177 ഏകദിനങ്ങളില് നിന്നാണ് ഈ നേട്ടം സ്വന്തമാക്കിയത്.
100 വിജയങ്ങള് സ്വന്തമാക്കുന്ന ആദ്യ ഇന്ത്യന് ക്യാപ്റ്റനെന്ന ബഹുമതിയും ഇനി ധോണിക്ക് സ്വന്തം. 62 മത്സരങ്ങളില് ഇന്ത്യ തോറ്റപ്പോള് നാലെണ്ണം ടൈ ആയി. 11 എണ്ണം ഉപേക്ഷിക്കുകയും ചെയ്തു. മാത്രമല്ല ഏറ്റവും കൂടുതല് വിജയം നേടിയ ക്യാപ്റ്റന്മാരുടെ ഇടയില് മൂന്നാം സ്ഥാനവും ധോണിക്കാണ്.
നൂറോ അതില്ക്കൂടുതലോ കളികളില് വിജയിച്ചിട്ടുള്ള മൂന്ന് ക്യാപ്റ്റന്മാരാണ് ഉള്ളത്. ആദ്യ രണ്ട് പേര് ഓസ്ട്രേലിയക്കാരായ റിക്കി പോണ്ടിംഗും അലന് ബോര്ഡറുമാണ്. ഇന്ത്യന് നായകരില് 174 മത്സരങ്ങളില് 90 എണ്ണത്തില് വിജയിപ്പിച്ച മുഹമ്മദ് അസറുദ്ദീനാണ് ധോണിക്ക് പിന്നില്. 147 മത്സരങ്ങളില് ടീമിനെ നയിച്ച ഗാംഗുലി 76 ജയം സമ്മാനിച്ചു.
ഇന്നലെ ബംഗ്ലാദേശിനെതിരെ ക്വാര്ട്ടറില് കളിക്കാനിറങ്ങുമ്പോള് മുന് ദക്ഷിണാഫ്രിക്കന് നായകന് ഹാന്സി ക്രോണ്യേയ്ക്കൊപ്പം 99 ജയങ്ങളുമയി നില്ക്കുകയായിരുന്നു ധോണി. ക്രോണ്യേ 138 മത്സരങ്ങളില് നിന്നാണ് ഇത്രയും ജയം സ്വന്തമാക്കിയത്.
99 വിജയങ്ങളുമായി ഹാന്സി ക്രോണ്യെ നാലാം സ്ഥാനത്തും 98 വിജയങ്ങളുമായി ന്യൂസീലന്ഡ് മുന് നായകന് സ്റ്റീഫന് ഫ്ളെമിങ് അഞ്ചാം സ്ഥാനത്തുമാണ്.
കൂടാതെ ലോകകപ്പില് ഏറ്റവും കൂടുതല് വിജയം നേടിയ ക്യാപ്റ്റന്, ലോകകപ്പില് തുടര്ച്ചയായി ഏറ്റവും കൂടുതല് മത്സരങ്ങളില് വിജയിച്ച ക്യാപ്റ്റന്, ഏകദിനത്തില് ഏറ്റവും കൂടുതല് മത്സരങ്ങളില് ഇന്ത്യയെ നയിച്ച ക്യാപ്റ്റന് എന്നീ റെക്കോര്ഡുകളും ധോണിയുടെ പേരിലാണ്.
