ആലക്കോട്: പരപ്പ സ്റ്റോണ്‍ ക്രഷര്‍മാനേജ്‌മെന്റിന്റെപേരില്‍ ജനകീയ സമര സമിതി പ്രവര്‍ത്തകരുടെ വീട്ടുവരാന്തകളില്‍ റീത്ത് വെച്ച സംഭവത്തില്‍ സമര സമിതി അംഗങ്ങളായ സിപിഎം നേതാക്കളും, ചില നേതാക്കളുടെ മക്കളും അറസ്റ്റിലായി. ഇതിന്റെ പേരില്‍ നാട്ടില്‍ സംഘര്‍ഷം സൃഷ്ഠിക്കാനുള്ള ശ്രമമായിരുന്നു സിപിഎം ആസുത്രണം ചെയ്തിരുന്നത്. മലയോരത്തെ ആകെ ഭീതിയിലാഴ്‌ത്തുന്ന വിധത്തില്‍ പരപ്പയിലെയും നെടുവോട്ടെയും ചില സമര സമിതി പ്രവര്‍ത്തകരുടെ വീടുകളിലും സമര സമിതി ഓഫീസിന് മുന്നിലുമാണ് ഭീഷണക്കത്തുകളും റീത്തുംവെച്ചത്. സംഭവവുമായി ബന്ധപ്പെട്ട് ഏഴ് സിപിഎമ്മുകാരെയാണ് പോലീസ് അറസ്റ്റുചെയ്തത്. പരപ്പ നെടുവോട് ജനകീയ വികസന സമിതി അംഗങ്ങളായ മനു മാത്യു മറ്റത്തില്‍ (42), ഇടക്കഴിക്കല്‍ ജോജോ ജോയി (29), പാഴുത്തടത്തില്‍ സാബു (42), ടോബിന്‍ തോമസ് കാടന്‍കാവില്‍ (35), അനൂപ് നെടുംപതാല്‍ (27), പ്രകാശ് വട്ടമല (41), മിഥുന്‍ പാറേ പറമ്പില്‍ (24) എന്നിവരാണ് അറസ്റ്റിലായത്.
പരപ്പ ക്രഷറിനെതിരെ സമര രംഗത്തുള്ള ജനകീയ സമിതിയുടെ സജീവ പ്രവര്‍ത്തകരാണ് ഏഴുപേരും. സ്വന്തം നേതാക്കളുടെയും പൊതുപ്രവര്‍ത്തകരുടെയും വീടുകളിലാണ് ഇവര്‍ റീത്തുകള്‍ വെച്ചത്. കഴിഞ്ഞ ദിവസം രാത്രിയായിരുന്നു സംഭവം.
നാട്ടില്‍ കലാപം സൃഷ്ടിക്കുന്നതിനാണ് ഇവര്‍ ശ്രമിച്ചത്. ക്രഷറിന്റെ പ്രവര്‍ത്തനം ഇപ്പോള്‍ പൂര്‍ണ്ണമായും നിലച്ചിരിക്കുകയാണ്. സംഭവത്തെ തുടര്‍ന്ന് തളിപ്പറമ്പ് ഡിവൈഎസ്പി കെ.വി.വേണുഗോപാലിന്റെ നിര്‍ദ്ദേശ പ്രകാരം ആലക്കോട് സിഐ ഇ.പി.സുരേഷിന്റെ നേതൃത്വത്തില്‍ പോലീസ് നടത്തിയ അന്വേഷണത്തിലാണ് സംഭവത്തിന് പിന്നില്‍ പ്രവര്‍ത്തിച്ച സഖാക്കളെ മണിക്കൂറുകള്‍ക്കകം പിടിയിലായത്. പിടിയിലായ സാബുവിന്റെ കാറിലാണ് റീത്തുകള്‍ കൊണ്ടുവന്നത്. മൂന്നു സംഘങ്ങളായി തിരിഞ്ഞാണ് പലയിടത്തായി റീച്ചുകള്‍ വെച്ചത്. പരപ്പ ക്വാറിയുടെ പേരില്‍ വ്യാജ ഭീഷണിക്കത്തുകള്‍ തയ്യാറാക്കിയത് എറണാകുളത്തുനിന്നാണ്. ജനകീയ സമിതിയിലെ ഉന്നതര്‍ക്കും ഇതില്‍ പങ്കുണ്ടെന്ന് സൂചന ലഭിച്ചിട്ടുണ്ട്.
