സ്വന്തം ലേഖകന്
കൊല്ലം: ഭക്ഷ്യസുരക്ഷാ നിയമപ്രകാരമുള്ള പുതിയ റേഷന് കാര്ഡുകളുടെ വിതരണം നടന്നില്ല. അച്ചടിച്ച കാര്ഡുകള് എത്താത്തതിനാലാണ് വിതരണം നടക്കാതിരുന്നതെന്ന് അധികൃതര് അറിയിച്ചു. 31നകം പുതിയ റേഷന്കാര്ഡിന്റെ വിതരണം പൂര്ത്തീകരിക്കുമെന്ന സര്ക്കാരിന്റെ വാക്ക് ഇതോടെ പാഴായി. കൊല്ലം താലൂക്കില് 2,56548 കാര്ഡാണ് വിതരണം ചെയ്യേണ്ടത്. കാര്ഡ് വിതരണം ചെയ്യുന്നതിന് മുന്നോടിയായുള്ള ഒരുക്കങ്ങള് ആരംഭിക്കാന് സര്ക്കാര് മാസങ്ങള്ക്ക് മുമ്പ് നിര്ദ്ദേശം നല്കിയിരുന്നു. അതനുസരിച്ച് റേഷന്കാര്ഡ് സ്റ്റോക്ക് ചെയ്യുന്നതിനുള്ള സൗകര്യം ഉള്പ്പടെ താലൂക്ക് ഓഫീസില് ഒരുക്കിയിരുന്നു.
വിതരണ കേന്ദ്രങ്ങളും കണ്ടെത്തിയിരുന്നു. രണ്ട് റേഷന് കടകള്ക്ക് കീഴില് ഒരു വിതരണകേന്ദ്രം എന്ന നിലയിലാണ് കണ്ടെത്തിയത്. പ്രദേശത്തെ ലൈബ്രറികള്, കമ്മ്യൂണിറ്റി സെന്ററുകള്, അങ്കണവാടികള്, പ്രൈവറ്റ് സ്ഥാപനങ്ങളുടെ ഹാളുകള് എന്നിവയാണ് വിതരണ കേന്ദ്രങ്ങളായി നിശ്ചയിച്ച് അറിയിപ്പ് നല്കിയത്. എന്നാല് കാര്ഡ് എത്താത്തതിനാല് ഉദ്യോഗസ്ഥര് കുഴപ്പത്തിലായി. കാര്ഡ് എന്നെത്തുമെന്ന കാര്യം ഉള്പ്പെടെ അധികാരികള്ക്ക് അറിയില്ല. ഇന്നലെ എത്തിച്ചേരുമെന്ന പ്രതീക്ഷയിലായിരുന്നു ഇവര്. ഫോട്ടോ എടുത്ത കാര്ഡ് ഉടമകള്ക്ക് ഇതോടെ റേഷന് പ്രതിസന്ധി അനുഭവപ്പെടും. മെയ് ഒന്നുമുതല് റേഷന്വിതരണം പുതിയ കാര്ഡുകള് വഴിയാണ്.
അതേസമയം ഭക്ഷ്യവകുപ്പ് മന്ത്രിക്ക് വകുപ്പ് കൈകാര്യം ചെയ്യാന് അറിയില്ലെന്ന ആരോപണവുമായി ഒരു വിഭാഗം റേഷന്കട ഉടമകള് ആഴ്ചകള്ക്ക് മുമ്പ് രംഗത്ത് എത്തിയിരുന്നു.
ഭക്ഷ്യവകുപ്പിന് വീഴ്ച സംഭവിക്കുന്നുവെന്നും ഉദ്യോഗസ്ഥ അഴിമതി വര്ധിക്കുന്നുവെന്നുമായിരുന്നു ആരോപണം.
വാതില്പടി നിയമനവും ജില്ലയില് അട്ടിമറിച്ചു. ഇ-സംവിധാനങ്ങള് നടപ്പാക്കാതെ റേഷന് വാതില്പടി വിതരണ എജന്സികളില് റേഷന് കടത്തുകാര് കടന്നുകൂടിയത് ഏറ്റവും കൂടുതല് ജില്ലയിലായിരുന്നു.
