മട്ടാഞ്ചേരി: കൊച്ചി കായല് ചരക്ക്, യാത്രാ കപ്പലുകളിലെ മാലിന്യ നിക്ഷേപകേന്ദ്രമാകുന്നു. തുറമുഖത്ത് എത്തുന്ന കപ്പലുകളില് നിന്നുള്ള പ്ലാസ്റ്റിക്ക് മാലിന്യങ്ങള് ഉള്പ്പെടെയുള്ള മാലിന്യങ്ങളാണ് കൊച്ചി കായലില് തള്ളുന്നത്.
മട്ടാഞ്ചേരി ഔട്ട് ഏജന്സി ജെട്ടിയില് ഇന്നലെ ബോട്ടുകളില് മാലിന്യ ചാക്കുമായി എത്തിയ സംഘത്തെ നാട്ടുകാര് തടഞ്ഞു. നാട്ടുകാരുടെ പ്രതിഷേധത്തെ തുടര്ന്ന് മട്ടാഞ്ചേരി പോലീസ് സ്ഥലത്തെത്തി പരിശോധന നടത്തി. കപ്പലില് നിന്ന് ശേഖരിക്കുന്ന മാലിന്യങ്ങളില് ആവശ്യമുള്ളത് എടുത്ത് ബാക്കി നഗരസഭയ്ക്ക് കൈമാറുകയാണ് പതിവെന്നും ഇതിനായുള്ള രേഖകള് തങ്ങളുടെ കൈവശമുണ്ടെന്നും ഇവര് പോലീസിനോട് പറഞ്ഞു.
കപ്പലില് നിന്ന് വിലകൂടിയ സാധനങ്ങള് കപ്പല് അധികൃതരുടെ ഒത്താശയോടെ കടത്തി കൊണ്ട് വരുന്നവരാണ് ഇതിന് പിന്നിലെന്ന് സൂചനയുണ്ട്. ചെറിയ ബോട്ടുകളിലായി ഇത്തരം സാധനങ്ങള് കടത്തി കൊണ്ട് വരുമ്പോള് പോലീസും സുരക്ഷാ ഉദ്യോഗസ്ഥരും അറിയാതിരിക്കുന്നതിനാണ് കപ്പലിലെ മാലിന്യങ്ങള് മുകളില് നിറക്കുന്നത്. ചരക്ക് ലക്ഷ്യ കേന്ദ്രങ്ങളിലെത്തിയാല് മാലിന്യം കായലിലേയ്ക്ക് തള്ളുകയാണ് പതിവ്.
കപ്പല് ജീവനക്കാര്ക്ക് ചരക്ക് കടത്തിനോടോപ്പം മാലിന്യനീക്കവും ഇതോടെ നടത്താനാകും. ഇത്തരത്തില് കപ്പല് അധികൃതര്ക്ക് കൂടിയ വില നല്കി സാധനങ്ങള് കടത്തുന്ന സംഘം കൊച്ചിയില് സജീവമാണ്. തെര്മക്കോള്, ഒഴിഞ്ഞ മദ്യ കുപ്പികള്, മറ്റ് പ്ലാസ്റ്റിക്ക് മാലിന്യങ്ങളാണ് കായലില് തള്ളുന്നത്. കൊച്ചി കായല് തീരത്തെ ആളൊഴിഞ്ഞ ഭാഗം നോക്കിയാണ് ഇവര് മാലിന്യങ്ങള് നിക്ഷേപിക്കുന്നത്.
രാത്രി കാലങ്ങളില് കായലോരത്തെ ചില പാലങ്ങളുടെ അടിഭാഗം കേന്ദ്രീകരിച്ച് ചാക്കിലാക്കിയ മാലിന്യങ്ങള് വേര്തിരിക്കും. ആവശ്യമുള്ളത് എടുത്തിട്ട് ബാക്കി കായലില് ഒഴുക്കുകയാണ് പതിവ്. കപ്പലില് നിന്ന് മാലിന്യങ്ങള് നീക്കം ചെയ്യാന് കരാറെടുക്കുന്നവരും ഇത്തരത്തില് കായലില് മാലിന്യം തള്ളുന്നുണ്ട്.
ഈ മാലിന്യങ്ങള് ഒഴുകിയെത്തിയാണ് ഫോര്ട്ട്കൊച്ചി കടപ്പുറം മലീനമാകുന്നത്. ഫോര്ട്ട്കൊച്ചി കടപ്പുറം ശുചീകരണ വേളയില് ഒഴിഞ്ഞ വിദേശ മദ്യകുപ്പികളാണ് കൂടുതലായി കിട്ടുന്നത്.
