വിളപ്പില്: മലയോര മേഖലയില് പുതിയതായി നിലവില്വരുന്ന ആര്ഡിഒ ആസ്ഥാനം സി. ദിവാകരന് എംഎല്എയുടെ മണ്ഡലത്തിലേക്ക്. ഇന്നലെ ചേര്ന്ന സിപിഐ ജില്ലാ കമ്മിറ്റിയില് ആസ്ഥാനം ഏത് മണ്ഡലത്തില് വേണമെന്ന വിഷയം ചര്ച്ച ചെയ്തിരുന്നു. സിപിഐയിലെ ചില പ്രബലര് ആസ്ഥാനം മലയോരത്തിന്റെ മദ്ധ്യഭാഗമെന്ന നിലയ്ക്ക് കാട്ടാക്കടയില് സ്ഥാപിക്കാമെന്ന് അഭിപ്രായപ്പെട്ടു. ആസ്ഥാനം നെടുമങ്ങാട് വേണമെന്ന നിലപാടില് സി. ദിവാകരന് ഉറച്ചുനിന്നു.
സി. ദിവാകരന് ഇടഞ്ഞതോടെ സിപിഐ ജില്ലാ കമ്മറ്റി മുട്ടുമടക്കി. ഒടുവില് നെടുമങ്ങാട്ട് ആര്ഡിഒ ആസ്ഥാനം സ്ഥാപിക്കുന്നതിന് സംസ്ഥാന കമ്മറ്റിയില് ശുപാര്ശ്ച ചെയ്യാന് ധാരണയായി. നിലവിലെ ആര്ഡിഒ ഓഫീസ് സ്ഥിതി ചെയ്യുന്ന കുടപ്പനകുന്നുമായി അതിര്ത്തി പങ്കിടുന്ന താലൂക്കാണ് നെടുമങ്ങാട്. പാറശാല, നെയ്യാറ്റിന്കര, കാട്ടാക്കട താലൂക്കിലുള്ളവര്ക്ക് നെടുമങ്ങാട് എത്തുകയെന്നത് ദുഷ്ക്കരമാണ്. മലയോര പ്രദേശത്തെ ജനങ്ങള്ക്ക് സൗകര്യപ്രദമായ സ്ഥാനത്ത് പുതിയ ആര്ഡിഒ ആസ്ഥാനമെന്ന സര്ക്കാര് നയം അട്ടിമറിക്കപ്പെടുന്നതാണ് ഈ തീരുമാനമെന്ന് പരക്കെ ആക്ഷേപമുയര്ന്നിട്ടുണ്ട്. സിപിഐക്കാരനായ ഡെപ്യൂട്ടി സ്പീക്കര് വി. ശശി തന്റെ മണ്ഡലമായ ചിറയിന്കീഴില് ആര്ഡിഒ ആസ്ഥാനം വേണമെന്ന് ആവശ്യമുന്നയിച്ചില്ല. പാറശാലയിലും നെയ്യാറ്റിന്കരയിലുമുള്ളവര് ചിറയിന്കീഴിലെത്തുന്നത് പ്രായോഗികമല്ലെന്ന തിരിച്ചറിവാണ് ശശിയെ ഇതില്നിന്ന് പിന്തിരിപ്പിച്ചത്. എന്നാല് ഇത്തരം വാദങ്ങളൊന്നും സി. ദിവാകരന് മുഖവിലയ്ക്കെടുത്തില്ല.
തെരഞ്ഞെടുപ്പ് പ്രചരണത്തിനിടയ്ക്ക് നെടുമങ്ങാട്ട് ആര്ഡിഒ ഓഫീസ് സ്ഥാപിക്കുമെന്ന് താന് ജനങ്ങള്ക്ക് വാക്കുകൊടുത്തതാണെന്ന് ദിവാകരന് ഡിസിയില് ശക്തമായി വാദിച്ചു. മുതിര്ന്ന നേതാവായ ദിവാകരനോട് മത്സരിക്കാന് ഡിസിയില് ആരും തയ്യാറായില്ല. ഫലത്തില് മലയോരത്തിന് അനുവദിച്ച ആര്ഡിഒ ആസ്ഥാനം നിലവിലെ ആര്ഡിഒ ഓഫീസിന്റെ മൂക്കിനു താഴെയുള്ള താലൂക്കിലാവും.
