കൊല്ലം: കൊല്ലം രൂപതയുടെ കീഴിലുള്ള ഫാത്തിമ മാതാ കോളജില് നിന്നും പുറത്ത് വരുന്നതും വിദ്യാര്ത്ഥികള്ക്ക് മേല് മാനേജ്മെന്റ് അടിച്ചേല്പ്പിക്കുന്ന തീരുമാനങ്ങളും നിയമങ്ങളുമാണ്. കോളേജില് പെണ്കുട്ടികള് ലെഗ്ഗിന്സ് ധരിച്ച് വരരുതെന്നാണ് മാനേജ്മെന്റിന്റെ ആജ്ഞ. നിയമം ലംഘിച്ച് ലെഗ്ഗിന്സ് ധരിച്ച് കോളേജില് വരുന്ന കുട്ടികള്ക്ക് പിഴയൊടുക്കേണ്ടി വരും ഇതിന് പുറമെ വിദ്യാര്ത്ഥികള്ക്ക് മാനസികമായി ബുദ്ധിമുട്ടുണ്ടാക്കുന്ന സംസാരമാണ് അധികൃതരുടെ ഭാഗത്ത് നിന്നുമുണ്ടാകുന്നതെന്നും വിദ്യാര്ത്ഥികള് പറയുന്നു.
ആണും പെണ്ണും ഒന്നിച്ചിരിക്കുന്നതിനും കോളജ് അധികൃതര് വിലക്കിയിട്ടുണ്ട്. മനേജ്മെന്റിന്റെ ഇത്തരം വിദ്യാര്ത്ഥിവിരുദ്ധ നടപടികള്ക്കെതിരെ കോളജിലെ വിദ്യാര്ത്ഥികള് ഒന്നടങ്കം സമരത്തിനിറങ്ങിയത്. ലിംഗവിവേചനത്തിനും വിദ്യാര്ത്ഥിനികളുടെ വസ്ത്രധാരണ രീതിയിലെ നിയന്ത്രണങ്ങള്ക്കുമെതിരെ കൊല്ലം ഫാത്തിമ മാതാ കോളേജില് വിദ്യാര്ത്ഥികള് 13നാണ് സമരം ആരംഭിച്ചത്. ക്യാമ്പസില് ആണ്കുട്ടികളും പെണ്കുട്ടികളും ഒന്നിച്ചിരിക്കുന്നതും പെണ്കുട്ടികള് ലെഗിന്സ് ഉള്പെടെയുള്ള വസ്ത്രങ്ങള് ധരിക്കുന്നതിലും കോളേജില് വിലക്കുണ്ടെന്നും സമരം ചെയ്യുന്ന വിദ്യാര്ത്ഥികള് പറയുന്നു.സംയുക്ത വിദ്യാര്ത്ഥി സംഘടനയുടെ നേതൃത്വത്തിലാണ് സമരം ചെയ്യുന്നത്.
ആണ്കുട്ടികളും പെണ്കുട്ടികളും അടുത്തിരിക്കാനോ അടുത്തിടപഴകാനോ പാടില്ലെന്നാണ് മാനേജ്മെന്റ് ഉത്തരവ്. 3000 വിദ്യാര്ത്ഥികള് പഠിക്കുന്ന കോളേജില് ഭൂരിഭാഗവും പെണ്കുട്ടികളാണ്. ഉച്ചഭക്ഷണത്തിന് ശേഷവും മറ്റ് ഒഴിവ് സമയത്തും പെണ്കുട്ടികള്ക്ക് ഇരിക്കുന്നതിനായി പ്രത്യേകം സ്ഥലം അനുവദിച്ചിട്ടുണ്ട്. കോട്രയാങ്കിള് എന്ന ഈ സ്ഥലത്ത് മാത്രമെ ഇവര് ഇരിക്കാന് പാടുള്ളു. വസ്ത്രധാരണ രീതിയുടെ പേരില് പെണ്കുട്ടികളെ പീഡിപ്പിക്കുന്നതും, ഇന്റേണല് എക്സാമുകളുടെ പേരില് അമിതഫീസ് ഈടാക്കുന്നതും ഉള്പെടെ അവസാനിപ്പിക്കണമെന്ന് ആവശ്യപ്പെട്ടാണ് സമരം. കോളേജിന്റെ പ്രധാനകവാടം പത്ത് മണിക്ക് തന്നെ അടയ്ക്കും. പിന്നീട് എത്തുന്ന വിദ്യാര്ത്ഥികള്ക്ക് പ്രവേശനമില്ല. ദൂരസ്ഥലങ്ങളില്നിന്നുമാണ് ഭൂരിഭാഗം വിദ്യാര്ത്ഥികളും വരുന്നത്. 10 മണി എന്നതില് നിന്നും ഒരുമിനിറ്റ് അങ്ങോട്ട് മാറിയാലും പ്രവേശനമില്ല. കുട്ടികളെ അകത്ത് കയറ്റിയാലും 10 മണി കഴിഞ്ഞാല് വാഹനം അകത്തേക്ക് പ്രവേശിപ്പിക്കില്ല. പുറത്ത് വാഹനങ്ങള് പാര്ക് ചെയ്തിട്ട് പോയാലും തങ്ങള്ക്ക് ഉത്തരവാദിത്വമില്ലെന്ന നിലപാടാണ് കോളേജ് വാച്ചര്മാര് സ്വീകരിക്കുന്നത്. പുറത്ത് സൂക്ഷിക്കുന്ന വാഹനങ്ങള് പോലീസ് അനധികൃതപാര്ക്കിങ്ങിന്റെ പേരില് സ്റ്റേഷനിലേക്ക് കൊണ്ട് പോവുകയും ചെയ്യും.
രക്ഷിതാക്കള് അദ്ധ്യാപകരെ കാണാനോ മക്കളുടെ വിദ്യാഭ്യാസ പുരോഗതി തിരക്കാനോ വന്നാലും 10 മണിക്ക് ശേഷം കയറ്റി വിടാറില്ലെന്നും സമരസമിതി പ്രതിനിധികള് പറയുന്നു. 10 മണിക്ക് ശേഷം പ്രവേശനമനുവദിക്കാത്തതില് പ്രതിഷേധിച്ച് കുറച്ച് ദിവസങ്ങള്ക്ക് മുന്പ് സംയുക്തവിദ്യാര്ത്ഥി സമിതിയുടെ ആഭിമുഖ്യത്തില് പത്ത് മണി സമരവും സംഘടിപ്പിച്ചിരുന്നു. നിയന്ത്രണങ്ങള് പിന്വലിക്കുന്നത് വരെ സമരം എന്ന നിലപാടിലാണ് വിദ്യാര്ത്ഥികള്.
