താനൂര്: രാത്രി രണ്ടുമണിക്ക് വാതില് ചവിട്ടി പൊളിച്ച് കയറിയ പോലീസുകാര് എന്റെ മക്കളെ പിടിച്ചുകൊണ്ടുപോയി. നാട്ടില് നടക്കുന്ന ഒരു പ്രശ്നത്തിനും എന്റെ മക്കള് പോകാറില്ല. പകലന്തിയോളം പണിയെടുത്ത ക്ഷീണത്തില് കിടന്നുറങ്ങിയ മക്കളെ പോലീസ് പിടിച്ചുകൊണ്ടുപോയ കഥ മൊയ്തീന്പള്ളി മൂസാന്റെപുരക്കല് കദീയമകുട്ടി കണ്ണീരോടെ പറയുന്നു.
11ന് സിപിഎം ലീഗ് സംഘര്ഷം നടന്നതിന്റെ പിന്നാലെ പോലീസ് നടത്തിയ അതിക്രമത്തിലെ ഇരയാണ് ഈ വൃദ്ധ. ഒരുതെറ്റും ചെയ്യാത്ത മക്കളെ തന്റെ മുന്നിലൂടെ വലിച്ചിഴച്ചുകൊണ്ടുപോയപ്പോള് ഈ അമ്മ തടയാന് ശ്രമിച്ചു. കേട്ടാലറക്കുന്ന അസഭ്യവര്ഷം നടത്തിയാണ് പോലീസ് ഈ അമ്മയെ നേരിട്ടത്. അതിനിടെ കുറെ പോലീസുകാര് കദീയമകുട്ടിയുടെ മകന് മെഹറലിയുടെ ബൈക്ക് അടിച്ചുതകര്ത്തു. വീടിന്റെ ജനലും, വാതിലും എല്ലാം തകര്ത്തു. ഗെയിറ്റ് പൊളിച്ചുമാറ്റി.
എന്ത് തെറ്റിന്റെ പേരിലാണ് ഇതൊക്കെ ചെയ്തതെന്ന് പോലീസ് പറഞ്ഞില്ല. സിപിഎമ്മുകാരുടെ ഒത്താശയോടെയാണ് പോലീസ് ഈ നരനായാട്ട് നടത്തിയതെന്നതിന് തീരദേശവാസികള്ക്ക് സംശയമില്ല.
