കോഴഞ്ചേരി:മാനസിക വൈകല്യമുള്ള പത്തുവയസ്സുപ്രായമുള്ള അഞ്ചാംക്ലാസ്സുകാരിയെ പീഡിപ്പിച്ചതിന് 52 കാരനെ പോലീസ് അറസ്റ്റു ചെയ്തു.
പുറമറ്റം പഞ്ചായത്തിലെ പടുതോട് കാവുങ്കല്‍ ലക്ഷം വീട് കോളനിയില്‍ താമസിക്കുന്ന അശോകനെയാണ് കോഴഞ്ചേരി സി.ഐ. ബി. അനിലിന്റെ നേതൃത്വത്തിലുള്ള പോലീസ് സംഘം ഞായറാഴ്ച രാത്രി പടുതോടു ജംഗ്ഷനില്‍ നിന്നും അറസ്റ്റു ചെയ്തത്.
അഞ്ചാംക്ലാസ്സുകാരി കളിക്കുന്നതിനുംമറ്റും ഇയാളുടെ വീടിന്റെ പരിസരത്തെത്തിയ ഈ സാഹചര്യം മുതലെടുത്താണ് ഇയാള്‍ കുട്ടിയെ പീഡിപ്പിക്കാന്‍ ശ്രമിച്ചതെന്ന് പോലീസ് പറഞ്ഞു. കഴിഞ്ഞ ദിവസങ്ങളില്‍ കുട്ടിയിലുണ്ടായ ഭാവമാറ്റങ്ങളെ തുടര്‍ന്ന് അമ്മ വിശദമായി ചോദിച്ചപ്പോഴാണ് കുട്ടി കാര്യങ്ങള്‍ പറഞ്ഞത്. തുടര്‍ന്ന് ഇവര്‍ പുറമറ്റം ഗ്രാമപഞ്ചായത്ത് മെമ്പറിന്റെ സഹായത്തോടെ കോയിപ്രം പോലീസില്‍ പരാതി നല്‍കുകയായിരുന്നു.
വര്‍ഷങ്ങളായി ഭാര്യയുമായി അകന്നു കഴിയുകയായിരുന്നു പ്രതി. മൂന്നാഴ്ചക്കുമുമ്പാണ് ഇയാള്‍ സ്വന്തം വീട്ടിലെത്തിയത്. ഇയാള്‍ക്ക് രണ്ട് പെണ്‍കുട്ടികളുണ്ട്.
കുട്ടികളുടെ പേരിലുള്ള ലൈംഗിക അതിക്രമങ്ങള്‍ തടയുന്നതിനുള്ള പോക്‌സെ വകുപ്പനുസരിച്ചാണ് കേസ് ചാര്‍ജ്ജ് ചെയ്തിരിക്കുന്നതെന്ന് അന്വേഷണ ഉദ്യോഗസ്ഥനായ കോഴഞ്ചേരി സി.ഐ. പറഞ്ഞു.
സി.ഐ.യെകൂടാതെ കോയിപ്രം എസ്.ഐ. പ്രൈജു, സീനിയര്‍ സിവില്‍ പോലീസ് ഓഫീസര്‍ ആര്‍. രാജേഷ് കുമാര്‍, അനില്‍കുമാര്‍ എന്നിവരും പോലീസ് സംഘത്തിലുണ്ടായിരുന്നു. പത്തനംതിട്ട കോടതിയില്‍ ഹാജരാക്കിയ ഇയാളെ പതിനഞ്ചു ദിവസത്തേക്ക് റിമാന്റു ചെയ്തു.
പ്രതികരിക്കാൻ ഇവിടെ എഴുതുക: