ഇരിട്ടി: ആറളം വന്യജീവി സങ്കേതത്തില്‍ കേരളാ വനം വന്യജീവി വകുപ്പിന്റെയും, മലബാര്‍ നാച്വറല്‍ ഹിസ്റ്ററി സൊസൈറ്റിയുടെയും ആഭിമുഖ്യത്തില്‍ നടന്നു വന്ന പക്ഷി സര്‍വേ സമാപിച്ചു. ആറളത്ത് തുടര്‍ച്ചയായി നടക്കുന്ന പതിനെട്ടാമത് പക്ഷി സര്‍വേ ആണ് ഇത്. വന്യജീവി സങ്കേതത്തില്‍ മുമ്പ് കണ്ടിട്ടില്ലാത്ത മൂന്നിനം അടക്കം 150പക്ഷി ജാതികളെയാണ് മൂന്നു ദിവസമായി നടന്ന സര്‍വെയില്‍ കണ്ടെത്തിയത്. ചാരക്കണ്ടന്‍ ബണ്ടിംഗ്, പോതപ്പൊട്ടന്‍, മഴക്കൊച്ച എന്നിവയെയാണ് പുതുതായി ഇവിടെ കണ്ടെത്തിയ പക്ഷിയിനം. ആറളം വന്യജീവി സങ്കേതത്തിലെ അനുരാജ്, ബിജു തേന്‍കുടി, രവി പാറക്കല്‍ എന്നിവരാണ് ഇവയുടെ ഫോട്ടോ ക്യാമറയില്‍ പകര്‍ത്തിയത്. ഇതോടെ വന്യജീവി സങ്കേതത്തില്‍ കണ്ടെത്തുന്ന പക്ഷികളുടെ എണ്ണം 244 ആയെന്നു വൈല്‍ഡ് ലൈഫ് വാര്‍ഡന്‍ വി.സജികുമാര്‍ പറഞ്ഞു.
നേരത്തെ പറഞ്ഞവരെ കൂടാതെ പ്രശസ്ത പക്ഷി നിരീക്ഷകരായ സത്യന്‍ മേപ്പയ്യൂര്‍ , മനോജ് ഇരിട്ടി, റോഷ്‌നാഥ്, ശുശാന്ത് മടപ്പുരക്കല്‍ തുടങ്ങി തെന്നിന്ത്യയിലെയും, ലക്ഷദ്വീപിലെയും എഴുപതോളം പക്ഷി നിരീക്ഷകര്‍ സര്‍വേയില്‍ പങ്കെടുത്തു. വന്യജീവി സങ്കേതത്തിലെ അഞ്ചു സ്ഥലങ്ങളില്‍ താമസിച്ചാണ് ഇവര്‍ നിരീക്ഷണം നടത്തിയത്. ഇന്തയില്‍ തന്നെ ആറളത്ത് മാത്രമാണ് തുടര്‍ച്ചയായി പക്ഷി സമ്പത്തിനെ കുറിച്ച് ഈ രീതിയിലുള്ള ശാസ്ത്രീയ നിരീക്ഷണം നടക്കുന്നത്. ഇന്നലെ വൈകുന്നരം നടന്ന ക്യാമ്പിന്റെ സമാപനം ആറളം വന്യജീവി സങ്കേതം വൈല്‍ഡ് ലൈഫ് വാര്‍ഡന്‍ വി.സജികുമാര്‍ ഉദ്ഘാടനം ചെയ്തു. സത്യന്‍ മേപ്പയ്യൂര്‍ സര്‍വേ യെക്കുറിച്ചു വിവരണം നല്‍കി. അസി. വൈല്‍ഡ് ലൈഫ് വാര്‍ഡന്‍ വി.മധുസൂദനന്‍ സ്വാഗതവും എച്ച്.ഷാജഹാന്‍ നന്ദിയും പറഞ്ഞു.
