ഇരിട്ടി: ആറളം വന്യജീവി സങ്കേതത്തിന് സമീപം നരിക്കടവില് ആനമതില് നിര്മ്മാണം നിലച്ചു. കേളകം പഞ്ചായത്തിലെ നരിക്കടവില് സ്വകാര്യ വ്യക്തിയുടെ പരാതിയെ തുടര്ന്നാണ് ആനമതില് നിര്മ്മാണം പാതിവഴിയില് നിലച്ചുപോയത്. ആനമതില് നിര്മ്മാണം നിലച്ചതോടെ പ്രദേസവാസികള് ഭയപ്പാടോടെയാണ് പ്രദേശത്ത് താമസിക്കുന്നത്. ഏതാനും മാസങ്ങള്ക്ക് മുന്പ് പ്രദേശത്ത് ഒരാളെ ആന ചവിട്ടിക്കൊന്നിരുന്നു. ആന മതില് നിര്മ്മാണം പുനരാരംഭിക്കാത്തത് കാരണം മരണഭീതിയിലാണ് നരിക്കടവ്, പൂക്കുണ്ട് മേഖലയിലെ ജനങ്ങള്. തര്ക്കഭൂമിയുടെ ഇരുഭാഗങ്ങളും മതില് നിര്മ്മാണം ഏകദേശം പൂര്ത്തിയായി നൂറു മീറ്ററോളം ദൂരം വരുന്ന ഭാഗത്താണ് നിര്മ്മാണം നിര്ത്തി വച്ചിരിക്കുന്നത്. ഈ ഭാഗത്തു കൂടി നിത്യേന എന്നോണം കാട്ടനക്കൂട്ടം ജനവാസ കേന്ദ്രത്തിലെത്തുകയാണ്. ബാക്കി ഭാഗങ്ങളിലെല്ലാം മതില് നിര്മ്മാണ പൂര്ത്തിയായതിനാല് പതിവ് ശൈലിയില് കാട്ടാനകളെ തുരത്താന് കഴിയുന്നില്ല. തര്ക്കം പരിഹരിച്ചെന്നും ഉടന് നിര്മ്മാണം തുടങ്ങുമെന്നും പ്രശനത്തില് ഇടപെട്ടപഞ്ചായത്ത് അധികാരികള് പറഞ്ഞെങ്കിലും ഇതുവരെയും തുടര് നടപടികള് ഉണ്ടായിട്ടില്ല.
കോടതിയുടെ പരിഗണനയിലുള്ള വിഷയം മധ്യസ്ഥ ചര്ച്ച മുഖേന പരിഹരിച്ചെങ്കിലും കേസില് ഉള്പ്പെട്ട കക്ഷികള് ഒരുമിച്ച് ഒപ്പിട്ട് കേസ് പിന്വലിക്കാനാവശ്യമായ അപേഷ കോടതിയില് സമര്പ്പിക്കണം എന്നതാണ് നിലവിലെ നിയമ തടസം. കളക്ടറും ഡിഎഫ്ഒയും നിര്മ്മാണ കമ്മറ്റി പ്രിസിഡന്റുമാണ് കേസിലെ എതിര്കക്ഷികള്. ഇതില് കളക്ടര് ഒഴികെയുള്ളവരുടെ ഒപ്പുകള് കേസ് പിന്വലിക്കാനായി ലഭിച്ചെങ്കിലും, കളക്ടറുടെ ഒപ്പു ലഭിക്കാത്തതാണ് ഇപ്പോഴുള്ള നിയമ തടസം. എന്നാല് പ്രശ്നം മദ്ധ്യസ്ഥ ചര്ച്ചയില് പരിഹരിച്ച സ്ഥിതിക്ക് സ്വകാര്യ വ്യക്തിക്ക് ഏകപക്ഷീയമായി കേസ് പിന്വലിക്കാവുന്നതാണ്. എന്നാല് സ്യകാര്യ വ്യക്തിയും ചില രാഷ്ട്രീയക്കാരും തമ്മിലുള്ള ഒത്തുകളിയുടെ ഭാഗമാണ് കേസ് പിന്വലിക്കാത്തത് എന്നാണ് നാട്ടുകാര് പറയുന്നത്. ഇനിയും ഒരു ജീവന് പൊലിയുന്നതിന് മുന്പ് തര്ക്ക പ്രദേശത്ത് ആനമതില് നിര്മ്മാണം നടത്തണമെന്നാണ് പ്രദേശവാസികളുടെ ആവശ്യം. കര്ണാടക, വയനാട് വനങ്ങളില് കാട്ടുതീ പടരുന്നതോടെ വന്തോതിലാണ് വന്യമൃഗങ്ങള് ആറളം കൊട്ടിയൂര് വന്യജീവി സങ്കേതങ്ങളിലെത്തി കൊണ്ടിരിക്കുന്നത്.
