കോട്ടയം: പുതുതലമുറ ചിത്രകാരന്മാര്‍ക്ക് പൗരാണിക ചിത്രകലയോട് താല്‍പ്പര്യമില്ലെന്നും ആര്‍ഷഭാരത സംസ്‌കൃതിയെക്കുറിച്ചുള്ള അവഗാഹമില്ലാത്തതാണ് ഇതിനുകാരണമെന്ന് ലളിതകലാ അക്കാദമി മുന്‍ അദ്ധ്യക്ഷന്‍ കെ.എ. ഫ്രാന്‍സീസ് പറഞ്ഞു. തപസ്യ കലാസാഹിത്യവേദി സംസ്ഥാനാടിസ്ഥാനത്തില്‍ നടത്തുന്ന ചിത്രകലാ ശില്‍പശാലയുടെ സ്വാഗതസംഘ രൂപീകരണയോഗം ഉദ്ഘാടനം ചെയ്യുകയായിരുന്നു അദ്ദേഹം.
ഭാരതസംസ്‌കൃതിയുടെ അനന്തമായ സാദ്ധ്യതകള്‍ അറിയണമെങ്കില്‍ സംസ്‌കൃതം വശത്താക്കണം. വിദേശരാജ്യങ്ങളില്‍ സംസ്‌കൃതം പഠിച്ച് വിദഗ്ധര്‍ ഉന്നതതലങ്ങളിലെത്തുന്നു. എന്നാല്‍ സംസ്‌കൃതത്തിന്റെ ഈറ്റില്ലമായ ഭാരതം അതിന് പുറംതിരിഞ്ഞുനില്‍ക്കുന്നു. കലയും സംസ്‌കാരവും ഊര്‍ജ്ജസ്വലമാകണമെങ്കില്‍ സംസ്‌കൃതം സജീവമായി നിലനിര്‍ത്തണമെന്നും ലക്ഷ്മീപാദവും വിഷ്ണുപാദവും ശ്രീചക്രവുമെല്ലാം വരയ്‌ക്കുവാന്‍ കഴിയണമെങ്കില്‍ കൃത്യമായ അളവുകള്‍ പാലിക്കണം. അതിനുള്ള തപസ്യയുടെ ശ്രമം അഭിനന്ദനീയമാണെന്നും അദ്ദേഹം അഭിപ്രായപ്പെട്ടു. പൊതിയില്‍ ഗുരുകുലം ഡയറക്ടര്‍ പി.എന്‍. നാരായണചാക്യാര്‍ അദ്ധ്യക്ഷതവഹിച്ചു.
കോട്ടയത്ത് 15നും 30നും ഇടയിലുള്ള യുവകലാകാരന്മാരെ ഉള്‍പ്പെടുതത്തി ശില്‍പ്പശാല ഏപ്രില്‍ 22,23 തീയതികളില്‍ നടത്താന്‍ തീരുമാനിച്ചതായി തപസ്യ സംസ്ഥാന ജനറല്‍ സെക്രട്ടറി പി.ജി. ഗോപാലകൃഷ്ണന്‍ പറഞ്ഞു.
കാനായി കുഞ്ഞിരാമന്‍ ഡയറക്ടറും, കവി എസ് രമേശന്‍ നായര്‍, തിരുവിഴ ജയശങ്കര്‍, ആലപ്പി രംഗനാഥ്, കെ.എ. ഫ്രാന്‍സീസ്, കോട്ടയം നസീ ര്‍, ഡോ. റോയിദേവസ്യ, ചിത്രാ കൃഷ്ണന്‍കുട്ടി, എന്‍. ശങ്കര്‍റാം തുടങ്ങി സമൂഹത്തിലെ ഉന്നതരായ വ്യക്തികളെ ഉള്‍പ്പെടുത്തി സ്വാഗതംസംഘം രൂപീകരിച്ചു. മേഖലാ പ്രസിഡന്റ് പി.എന്‍. ബാലകൃഷ്ണന്‍, എ. കേരളവര്‍മ്മ, പി. ജയദേവ്, സി.സി. അശോകന്‍, പി.പ്രസാദ എന്നിവര്‍ പ്രസംഗിച്ചു.
