കണ്ണൂര്: കൊട്ടിയൂരില് പതിനാറുകാരിയെ പീഡിപ്പിച്ച് ഗര്ഭിണിയാക്കിയ കേസില് പ്രതിചേര്ക്കപ്പെട്ട കന്യാസ്ത്രീകളുള്പ്പെടെയുള്ളവരെ അറസ്റ്റ് ചെയ്യാന് പോലീസ് വിമുഖത കാണിക്കുന്നത് മുന്കൂര് ജാമ്യത്തിന് ഹര്ജി നല്കാന് അവസരം നല്കാനെന്ന് ആരോപണം. കേസിലുള്പ്പെട്ട പ്രതികളെ തിരിച്ചറിഞ്ഞ് ഒരാഴ്ച കഴിഞ്ഞെങ്കിലും ഒന്നാം പ്രതിയായ ഫാദര് വടക്കുംചേരിയൊഴിച്ച് ആരെയും ഇതുവരെ പോലീസ് അറസ്റ്റ് ചെയ്തിട്ടില്ല. പ്രതികള് ജോലിചെയ്തിരുന്ന സ്ഥാപനങ്ങളില് പോലീസ് എത്തിയിരുന്നെങ്കിലും ആരും സ്ഥലത്തില്ലെന്ന വിശദീകരണത്തിന്റെ അടിസ്ഥാനത്തില് തിരിച്ച് പോവുകയായിരുന്നു. ആദ്യദിവസം പോലീസ് മഠത്തിലെത്തിയപ്പോള് പ്രതികള് സ്ഥലത്തുണ്ടായിരുന്നതായി സൂചനയുണ്ടായിരുന്നെങ്കിലും സ്ത്രീകളെ രാത്രി അറസ്റ്റ് ചെയ്യേണ്ടെന്ന നിലപാടിലായിരുന്നു പോലീസ്. സ്ഥാപനങ്ങളില് കയറി പ്രതികളെ അറസ്റ്റ് ചെയ്യേണ്ടെന്നാണ് പോലീസിന്റെ ഇപ്പോഴത്തെ തീരുമാനം. അതുകൊണ്ടുതന്നെ സഭയുടെ നിയന്ത്രണത്തില് പ്രവര്ത്തിക്കുന്ന ഏതെങ്കിലും സ്ഥാപനങ്ങളില് പ്രതികള്ക്ക് സുരക്ഷിതമായി ഒളിവില് കഴിയാന് സാധിക്കും. കുട്ടികള്ക്കെതിരായ ലൈംഗികാതിക്രമങ്ങള് തടയുന്ന പോക്സോ പ്രകാരമാണ് പ്രതികള്ക്കെതിരെ കേസെടുത്തിരിക്കുന്നത്. ജാമ്യം ലഭിക്കാന് സാധ്യതയില്ലാത്ത കേസില് മുന്കൂര് ജാമ്യം നല്കി ജയില്വാസമൊഴിവാക്കാനാണ് കന്യാസ്ത്രീകളുള്പ്പെടെയുള്ള പ്രതികള് ശ്രമിക്കുന്നത്.
അറസ്റ്റില്ല: മുന്കൂര് ജാമ്യത്തിന് അവസരം നല്കാനെന്ന് ആരോപണം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.