കോട്ടയം: യാക്കോബായ സഭ കോട്ടയം ഭദ്രാസത്തില് കാതോലിക്ക ബാവയുടെ വിലക്ക് ലംഘിച്ച് വിളിച്ചുചേര്ക്കപ്പെട്ട കൗണ്സില്യോഗം ബഹളത്തില് കലാശിച്ചു. സിനഡ് തീരുമാനങ്ങള് ലംഘിച്ചുള്ള നീക്കമാണ് ഭദ്രാസന മെത്രാപ്പോലീത്തായും കൂട്ടരും നടത്തിയിരിക്കുന്നതെന്ന ആക്ഷേപമാണ് ഒരു വിഭാഗം ഉന്നയിക്കുന്നത്. കഴിഞ്ഞ ദിവസം നടന്ന ഭദ്രാസ കൗണ്സിലില് യോഗം മൊത്തത്തില് ബഹളത്തില് കലാശിച്ചു.
കോട്ടയം ഭദ്രാസനത്തിലെ കൗണ്സില് യോഗം സംഘര്ഷ സാധ്യത കണക്കിലെടുത്ത് കഴിഞ്ഞദിവസം ശ്രേഷ്ഠ കാതോലിക്ക ബാവാ റദ്ദ് ചെയ്തിരുന്നു. എന്നാല് അത് അവഗണിച്ച് കൗണ്സില് ചേരാന് മെത്രാപ്പോലീത്തായെ അനുകൂലിക്കുന്ന അംഗങ്ങള് രംഗത്തുവന്നതാണ് പ്രശ്നങ്ങള്ക്ക് വഴിവെച്ചത്. ഇതോടെ ബാവയുടെയും സുന്നഹദോസിന്റെയും തീരുമാനങ്ങളാണ് തെറ്റിച്ചിരിക്കുന്നതെന്ന് ഭദ്രാസന മെത്രാപ്പോലീത്താ തോമസ് മാര് തീമോത്തിയോസിനെ എതിര്ക്കുന്നവര് ചൂണ്ടിക്കാട്ടുന്നു. കോട്ടയം ഭദ്രാസനത്തിലെ എല്ലാ കാര്യങ്ങളും ശ്രേഷ്ഠ ബാവയുടെ അനുമതിയോടെ മാത്രമെ നടത്താവൂ എന്നാണ് സുന്നഹദോസ് തീരുമാനമെന്നാണ് ഇവര് പറയുന്നത്.
ഭദ്രാസന മെത്രാപ്പോലീത്ത തോമസ് തീമോത്തിയോസിന്റെ അധ്യക്ഷതയിലാണ് കൗണ്സില് യോഗം ചേരാന് തീരുമാനിച്ചത്. ഭദ്രാസന സെക്രട്ടറി , അല്മായ സെക്രട്ടറി എന്നിവരുടെ നേതൃത്വത്തില് ഈ നീക്കം തടഞ്ഞു. ഇതോടെ ഇവര്ക്കുനേരെ മെത്രാപ്പോലീത്തായോടൊപ്പം നില്കുന്ന വൈദീകരും മണര്കാട് പള്ളിയിലെ മുന് ഭരണസമിതി അംഗങ്ങളും വാക്കേറ്റവുമായി രംഗത്തെത്തി. തുടര്ന്ന് ചേരിതിരിഞ്ഞുള്ള തര്ക്കങ്ങള് സംഘര്ഷത്തിന്റെ വക്കോളമെത്തി.
ഭദ്രാസനത്തിന്റെ സ്വത്ത് സംബന്ധിച്ച് കോട്ടയം ഭദ്രാസനത്തില് അഭിപ്രായവ്യത്യാസം ഉടലെടുത്തിരുന്നു. ഭദ്രാസനത്തിന്റെ സ്വത്തുകള് ഭദ്രാസനത്തിന്റെ കീഴിലാക്കണമെന്നും മെത്രാപ്പോലീത്താമാര് കൈകാര്യം ചെയ്യുന്നതും ഇവരുടെ പേരിലുള്ളതുമായ സ്വത്തുകള് സഭയ്ക്കു നല്കണമെന്ന് പാത്രിയര്ക്കീസ് ബാവാ കല്പ്പന പുറപ്പെടുവിച്ചിരുന്നു. എന്നാല് കോട്ടയം ഭദ്രാസനത്തില് സ്വത്തുക്കള് സഭയ്ക്കു കൈമാറിയിട്ടില്ല. സഭയുടെ സ്വത്തുക്കള് സ്വകാര്യ ട്രസ്റ്റുകളായാണു ഭരണം നടത്തുന്നത്. ഇത് കൈകാര്യം ചെയ്യുന്നവരാണ് ഇപ്പോള് ഭദ്രാസന മെത്രാപ്പോലീത്തായ്ക്കൊപ്പമുള്ളത്. ഇത് തിരികെ നല്കണമെന്നാവശ്യവുമായാണ് അല്മായരും വൈദീകരും രംഗത്തുവന്നത്.
സംഭവത്തില് പ്രതിഷേധിച്ച് ഭദ്രാസന ഓഫിസില് പ്രതിഷേധയോഗം ചേരുകയും പ്രമേയം പാസാക്കുകയും ചെയ്തു. റദ്ദ് ചെയ്ത കൗണ്സിലില് നടന്ന എല്ലാകാര്യങ്ങളും കാണിച്ച് കാതോലിക്കായ്ക്ക് പരാതി നല്കാനും തീരുമാനിച്ചു.
