ചേര്ത്തല: ഭക്ഷ്യ ഭദ്രതാ നിയമപ്രകാരം തയ്യാറാക്കിയ കരട് ഗുണഭോക്തൃപട്ടികയില് നിന്നു മത്സ്യതൊഴിലാളികളെ കൂട്ടത്തോടെ ഒഴിവാക്കിയതായി ആരോപിച്ച് മത്സ്യതൊഴിലാളി കുടുംബങ്ങളിലെ സ്ത്രീകള് താലൂക്ക് റേഷനിങ് ഇന്സ്പെക്ടറെ തടഞ്ഞുവച്ചു.
അര്ത്തുങ്കല് തീരപ്രദേശത്തു നിന്നുമെത്തിയ ഇരുന്നൂറോളം സ്ത്രീകളാണ് ഇന്നലെ രാവിലെ ചേര്ത്തല താലൂക്ക് സപ്ലൈ ഓഫിസിലെത്തി പ്രതിഷേധം അറിയിച്ചത്. മത്സ്യബന്ധനം നടത്തി ഉപജീവനം കഴിയുന്ന കുടുംബങ്ങളാണ് തഴയപ്പെട്ടതെന്നാണ് ആക്ഷേപം. അതേസമയം സര്ക്കാര് ഉദ്യോഗസ്ഥരും നാലുചക്രവാഹനങ്ങളുള്ളവരുമുള്പ്പെടെ അനേകം അനര്ഹര് പട്ടികയില് കടന്നുകൂടിയിട്ടുണ്ടെന്നും ഇവര് പരാതിപ്പെട്ടു.
അധികൃതര് നടത്തിയ ചര്ച്ചയില് പരാതിക്കാരുടെ വിലാസവും റേഷന് കാര്ഡ് നമ്പറും എഴുതി വാങ്ങുകയും ഇവരെ ഉള്പ്പെടുത്തുന്നത് പരിഗണിക്കാമെന്ന് ഉറപ്പു നല്കി. അതേസമയം കരട് പട്ടിക സംബന്ധിച്ച് വ്യാപക പരാതികളാണ് ഉയരുന്നത്. ചേര്ത്തല താലൂക്കിലെ പട്ടികയില് 51,000 പേരാണ് പട്ടികയിലുള്ളത്. പഴയ പട്ടികയില് നിന്ന് നാലായിരത്തോളം പേരെയാണ് ഒഴിവാക്കിയത്.
കരട് പട്ടികകള് അതാത് വാര്ഡ് സഭകളില് ചര്ച്ച ചെയ്ത് അംഗീകരിക്കുന്നതിന് നിര്ദേശം നല്കിയിട്ടുണ്ടെങ്കിലും പട്ടികയില് ഒരാളെ പോലും കൂടുതലായി ചേര്ക്കുവാന് കഴിയാത്ത സ്ഥിതിയാണ്.
