മണ്ണഞ്ചേരി: കേരളാ സ്പിന്നേഴ്സില് തിങ്കളാഴ്ച മുതല് എഐടിയുസി തൊഴിലാളികളും ജോലിക്കുകയറിതുടങ്ങും. സ്ഥാപനത്തിലെ ജോലി എടുക്കുന്നതുമായി ബന്ധപ്പെട്ട് എഐടിയുസിയും സിപിഐ പ്രാദേശികനേതൃത്വവും എടുത്ത നിലപാടിനെചൊല്ലി സിപിഐ ജില്ലാനേതൃത്വത്തില് കടുത്ത ഭിന്നത മറനീക്കിപുറത്തുവരുകയായിരുന്നു.
വിഷയം ശ്രദ്ധയില്പ്പെട്ടതോടെ സംസ്ഥാനനേതൃത്വം ഇടപെടുകയായിരുന്നു. സംസ്ഥാനസെക്രട്ടറി കാനം രാജേന്ദ്രന് ജില്ലാ സെക്രട്ടറിയെ വിളിച്ച് സ്ഥാപനത്തിന്റെ പ്രവര്ത്തനം സുഗമമാക്കാന് നിര്ദേശിക്കുകയായിരുന്നു. പ്രദേശത്തെ പാര്ട്ടിയിലെ മുതിര്ന്ന നേതാവ് നിലവിലെ സംഭവങ്ങള് കാനത്തെ അറിയിച്ചതായും അറിയുന്നു. സിപിഐ സംസ്ഥാനസെക്രട്ടറിയുടെ സന്ദേശം എത്തിയതോടെ ജില്ലാസെക്രട്ടറി ടി.ജെ. ആഞ്ചലോസ് അടിയന്തിരമായി സ്പിന്നേഴ്സിലെ എഐടിയുസിക്കാരുടെ ജനറല്ബോഡി വിളിക്കാന് യൂണിയന് പ്രസിഡന്റ് അഡ്വ. വി. മോഹന്ദാസിനെ ചുമതലപ്പെടുത്തി.
തുടര്ന്നാണ് യൂണിയന് എടുത്ത ശക്തമായ നിലപാട് മാറ്റാന് മനസില്ലാമനസോടെ ഇവര് തീരുമാനിച്ചത്. തുടര്ച്ചയായി പ്രവര്ത്തനം നിലക്കുകയും തുടങ്ങുകയും ചെയ്യുന്ന കേരളാ സ്പിന്നേഴ്സില് ജോലി സ്ഥിരതയും ആനുകൂല്യത്തിലെ വര്ദ്ധനയടക്കമുള്ള തീരുമാനങ്ങള് എടുക്കണമെന്ന വാദമായിരുന്നു എഐടിയുസി സ്വീകരിച്ചത്. ഇതിന് സ്ഥാപനത്തിലെ മുഴുവന് തൊഴിലാളികളുടെയും മാനസികപിന്തുണയും ലഭിച്ചിരുന്നു.
ഈ സന്ദര്ഭത്തിലാണ് സ്ഥലം എംഎല്എയും ധനമന്ത്രിയുമായ തോമസ് ഐസക്കിനെ പ്രതിക്കൂട്ടില്നിര്ത്തിയുള്ള സിപിഐ പ്രാദേശികനേതൃത്വത്തില് പ്രതിഷേധം സംഘടിപ്പിച്ചത്. ഇത് സിപിഎം നേതൃത്വം ഐസക്കിന്റെ ശ്രദ്ധയില്പ്പെടുത്തിയിരുന്നു. ഈ വിവരം തോമസ് ഐസക്കും കാനം രാജേന്ദ്രനെ അറിയിച്ചതോടെയാണ് വിഷയത്തിന് സംസ്ഥാനതല ശ്രദ്ധയായത്. ലോകോളേജിലെ വിഷയം അടക്കം സിപിഎമ്മുമായി അകല്ച്ചനിലനില്ക്കുമ്പോള് എല്ലായിടത്തും പരസ്പരം കലാപം വേണ്ടെന്നാണ് കാനം സിപിഐ ജില്ലാനേതൃത്വത്തെ അറിയിച്ചിട്ടുള്ളത്.
മാര്ച്ച് നാലിന് ധനമന്ത്രി സ്പിന്നേഴ്സിലെ നേതാക്കളെ കണ്ട് ചര്ച്ചനടത്തുമെന്നും വിവരമുണ്ട്.കഴിഞ്ഞ രണ്ട് ദിവസമായി സ്ഥാപനത്തില് ആറും എട്ടു പേര്വീതം ജോലിയില് പ്രവേശിച്ചിരുന്നു. ബിഎംഎസ്, സിഐ ടിയു, ഐഎന്ടി യുസി തൊഴിലാളികളാണ് കഴിഞ്ഞ ദിവസങ്ങളില് ജോലിക്കുകയറിയത്.
