ആലുവ: ശിവരാത്രി ബലിതര്പ്പണത്തിനായി ജനങ്ങള് ഒഴുകിയെത്തിയപ്പോള് ആലുവ പെരിയാറിന്റെ ഇരുകരകളും ജനസാഗരമായി. ഇന്നലെ വൈകിട്ടോടെ പെരിയാര് തീരത്തേക്ക് ആരംഭിച്ച ഒഴുക്ക് ഇന്ന് പുലര്ച്ചെയും തുടരുകയാണ്. ആലുവ നഗരസഭ, തിരുവിതാംകൂര് ദേവസ്വം ബോര്ഡ്, ആലുവ അദൈ്വതാശ്രമം എന്നിവയുടെ നേതൃത്വത്തില് ഭക്തര്ക്കാവശ്യമായ അടിസ്ഥാന സൗകര്യങ്ങളെല്ലാം ഏര്പ്പെടുത്തിയിട്ടുണ്ട്.
മണപ്പുറത്തെ താത്കാലിക മുനിസിപ്പല് ഓഫീസില് ഇന്നലെ വൈകിട്ട് പ്രത്യേക കൗണ്സില് യോഗം ചേര്ന്ന് സുരക്ഷാ ക്രമീകരണങ്ങള് വിലയിരുത്തി. ചെയര്പേഴ്സണ് ഉള്പ്പെടെ മുഴുവന് കൗണ്സിലര്മാരും മേല്നോട്ടം വഹിച്ചു.
ഇന്നലെ രാത്രി പത്ത് മണിയോടെയാണ് ബലിതര്പ്പണം ആരംഭിച്ചത്. ഇന്ന് ഉച്ചവരെ ശിവരാത്രി ബലിതര്പ്പണചടങ്ങുകള് നീണ്ടുനില്ക്കും. സംസ്ഥാനത്തിന്റെ വിവിധ ഭാഗങ്ങളില് നിന്നായി പത്ത് ലക്ഷത്തോളം പേര് എത്തിച്ചേരും.
മണപ്പുറത്തെ ബലിതര്പ്പണ ചടങ്ങുകള്ക്ക് ദേവസ്വം ബോര്ഡും അദൈ്വതാശ്രമത്തിലെ ബലിതര്പ്പണ ചടങ്ങുകള്ക്ക് ശ്രീനാരായണ ധര്മ്മസംഘം ട്രസ്റ്റുമാണ് നേതൃത്വം നല്കുന്നത്. മണപ്പുറത്ത് ദേവസ്വം ബോര്ഡ് ഒരേ സമയം 600 പേര്ക്ക് തര്പ്പണത്തിന് സൗകര്യമുള്ള ബലിത്തറ ഒരുക്കിയിട്ടുണ്ട്. ദേവസ്വത്തിന്റെ പുരോഹിതന്മാരാണ് ചടങ്ങുകള്ക്ക് കാര്മ്മികത്വം വഹിച്ചത്. ഇതിന് പുറമെ 100 ഓളം താല്കാലിക ബലിത്തറകളുണ്ട്. അദൈ്വതാശ്രമത്തില് ഒരേസമയം 4000ത്തോളം പേര്ക്ക് തര്പ്പണ സൗകര്യമൊരുക്കിയിരുന്നു.
ശിവരാത്രിയോടനുബന്ധിച്ച് മണപ്പുറത്ത് നഗരസഭയുടെ നേതൃത്വത്തില് മൂന്ന് ആഴ്ചയോളം നീണ്ടു നില്ക്കുന്ന വ്യാപാരമേളയും വിനോദ പരിപാടികളുമുണ്ട്. 200 ഓളം സ്റ്റാളുകളുമുണ്ട്. താല്ക്കാലിക നഗരസഭാ ഓഫീസ്, പോലീസ് സ്റ്റേഷന്, ഫയര് സ്റ്റേഷന്, കെഎസ്ഇബി ഓഫീസ്, കെഎസ്ആര്ടിസി ഓഫീസ്, ജില്ലാ ആശുപത്രിയുടെ പ്രഥമ ശുശ്രൂഷ യൂണിറ്റ്, ഹോമിയോ ചികിത്സാ യൂണിറ്റ്, മീഡിയ സെന്റര് എന്നിവ വ്യാപാരമേള അവസാനിക്കും വരെ മണപ്പുറത്തുണ്ടാകും. കൂടാതെ ഇന്നും നാളെയും കെഎസ്ആര്ടിസി ഓഫീസ്, താലൂക്ക് ഓഫീസ് താലൂക്ക് ആശുപത്രിയുടെ പ്രഥമ ശുശ്രൂഷ യൂണിറ്റ് എന്നിവയും മണപ്പുറത്തുണ്ടാകും.
കൊട്ടാരക്കടവില്നിന്ന് മണപ്പുറത്തേയ്ക്ക് നിര്മ്മിച്ച സ്ഥിരം നടപ്പാലം ജനങ്ങള്ക്ക് ഏറെ സൗകര്യമായി.
30 ലക്ഷം രൂപ ചെലവഴിച്ചാണ് മണപ്പുറം ദീപാലങ്കൃതമാക്കിയത്. നഗരസഭയുടെയും ജില്ലാ ആശുപത്രിയുടെയും മറ്റ് സ്വകാര്യ ആംബുലന്സുകളും സുരക്ഷക്കായി സജ്ജീകരിച്ചിരുന്നു. തോട്ടക്കാട്ടുകര മുതല് ആല്ത്തറ വരെയും പാലസ് റോഡ് മുതല് കൊട്ടാരക്കടവ് വരെയും വഴിയോര കച്ചവടം നിരോധിച്ചതും ഭക്തജനങ്ങള്ക്ക് സൗകര്യമായി.
