തിരുവനന്തപുരം: മലയാളം മിഷന്റെ നേതൃത്വത്തില് മാതൃഭാഷാ ദിനാഘോഷവും പ്രവാസി ശില്പ്പശാലയും സംഘടിപ്പിക്കുമെന്ന് മിഷന് ഡയറക്ടര് പ്രൊഫ. സുജ സൂസന് ജോര്ജ്, രജിസ്ട്രാര് കെ. സുരേഷ് എന്നിവര് വാര്ത്താസമ്മേളനത്തില് പറഞ്ഞു. ‘മലയാണ്മ-2017’ എന്ന പേരില് സംഘടിപ്പിക്കുന്ന മാതൃഭാഷാ ദിനാഘോഷം മാതൃഭാഷാദിനമായ 21ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. വിജെടി ഹാളില് രാവിലെ 10 ന് നടക്കുന്ന പരിപാടിയില് കവയിത്രി സുഗതകുമാരി മുഖ്യപ്രഭാഷണം നടത്തും. പുസ്തകോത്സവം സാംസ്കാരിക സെക്രട്ടറി റാണി ജോര്ജ് ഉദ്ഘാടനം ചെയ്യും.
‘മലയാളഭാഷയുടെ രൂപപരിണാമങ്ങള് 60 വര്ഷങ്ങളില്’- വിഷയം ഡോ സി.ആര്. പ്രസാദ് അവതരിപ്പിക്കും. പകല് രണ്ടിന് ഡോ രത്നശ്രീ അയ്യരുടെ തബല-വയലിന് ജുഗല്ബന്ദി. വൈകിട്ട് 4.30ന് മാധ്യമങ്ങളിലെ മലയാളം-രൂപ പരിണാമങ്ങള് സെമിനാര് നടക്കും. 22ന് പകല് 11ന് പ്രവാസി ശില്പ്പശാല മന്ത്രി എ.കെ. ബാലന് ഉദ്ഘാടനം ചെയ്യും. പകല് രണ്ടിന് മലയാളം മിഷന് പ്രവര്ത്തന വിപുലീകരണം വിഷയാവതരണം. വൈകിട്ട് 6.30ന് ഭാരത്ഭവന്റെ സംഗീതശില്പം ‘മലയാളം 60 വര്ഷം’. 23ന് പകല് 12ന് ചര്ച്ച ക്രോഡീകരണം. 12.30ന് പ്രൊഫ. വി. മധുസൂദനന് നായര്, പ്രൊഫ. വി.എന് മുരളി എന്നിവരുടെ പ്രഭാഷണം.
