മട്ടാഞ്ചേരി: ഇടതുപക്ഷത്തിന്റെ കൊച്ചി മണ്ഡലം സമര പ്രചരണ ജാഥയില് സിപിഐക്ക് ഭ്രഷ്ട്. സിപിഎമ്മിന്റെ കെ.ജെ. മാക്സിയാണ് ജാഥ നായകന്. എല്ഡിഎഫ് രാജ്ഭവന് സമര പ്രചരണവുമായാണ് പ്രചരണ ജാഥ നടത്തിയത്. ഇതില് പ്രതിഷേധ വുമായി സിപിഐ പ്രത്യേക ജാഥ നടത്താനൊരുങ്ങുകയാണ്. കൊച്ചിയില് സിപിഎം ഘടകകക്ഷികള്ക്ക് മേല് കടുത്ത മേല്ക്കോയ്മ നടത്തുകയാണന്ന് ആരോപണമുയര്ന്നിട്ടുണ്ട്. സിപിഎം വിട്ടവരെ സിപിഐ സ്വീകരിച്ചതിന്റെ പേരിലാണ് ഇരുവരും തമ്മിലുള്ള ശീതസമരം മറനീക്കി പുറത്തായത്. കുമ്പളങ്ങിയിലും നസ്രത്തും സിപിഎം വിട്ടവരെ സിപിഐ സ്വീകരിച്ചതില് പാര്ട്ടി നേതൃത്വം പ്രതിഷേധമറിയിച്ചിരുന്നു. ഉന്നത കേന്ദ്രങ്ങള് ഇടപെട്ടെങ്കിലും സിപിഐയെ കൂടെ ചേര്ക്കുന്നതില് സിപിഎം തയ്യാറായില്ല.
ഇടതുസമരങ്ങളില് നിന്ന് സിപിഐയെ മാറ്റി നിര്ത്തിയത് ഏറെ ചര്ച്ച ചെയ്യപ്പെട്ടു. കൊച്ചി മണ്ഡലത്തില് ഇടതു മുന്നണിയില് ഘടകകക്ഷികള്ക്ക് വേണ്ട പ്രാധാന്യം നല്കാതെയാണ് സിപിഎം പ്രവര്ത്തനമെന്നും മുന്നണി പ്രവര്ത്തകര് പറയുന്നു. ബുധനാഴ്ച രാവിലെ ചെല്ലാനം കണ്ണമാലിയില് നിന്നാണ് എംഎല്എ പ്രചരണ ജാഥ തുടങ്ങിയത്. ഇവിടെ ജനകീയരായ ചില സിപിഐക്കാരെ ഏകപക്ഷീയമായി ജാഥയില് ക്ഷണിച്ചുവെങ്കിലും മണ്ഡലം നേതൃത്വത്തെ ഒഴിവാക്കിയുള്ള തീരുമാനത്തില് പ്രതിഷേധിച്ച് ഇവര് ഒഴിഞ്ഞു നില്ക്കുകയും ചെയ്തു.
കൊച്ചിയില് വിവിധ കേന്ദ്രങ്ങളില് പ്രചരണ ജാഥയ്ക്ക് വേണ്ടത്ര സ്വീകാര്യത ലഭിച്ചില്ലെന്നാണ് റിപ്പോര്ട്ട്.
