കല്‍പ്പറ്റ : കാട്ടുതീ പ്രതിരോധത്തിന് ആധുനിക സംവിധാനങ്ങളില്ലാതെ വനം-വന്യജീവിവകുപ്പ്. കാട്ടുതീ തടയുന്നതിനു ഫയര്‍ലൈന്‍ നിര്‍മിച്ചും ഫയര്‍വാച്ചര്‍മാരെ കരാര്‍ വ്യവസ്ഥയില്‍നിയമിച്ചും മുന്നൊരുക്കം നടത്തുന്ന വകുപ്പ് നിര്‍ണായക ഘട്ടങ്ങളില്‍ പതറുകയാണ്. തീ അണയ്‌ക്കുന്നതിന് മച്ചാനകളടക്കം പ്രാകൃതമുറകളാണ് വനപാലകര്‍ക്ക് ഇന്നും ശരണം. വനത്തില്‍ അഗ്നിബാധ ഉണ്ടാകുമ്പോള്‍ ഫയര്‍ ആന്‍ഡ് റസ്‌ക്യൂ ഫോഴ്‌സിന്റെ സേവനം ലഭിക്കുമെങ്കിലും പലപ്പോഴും പ്രയോജനപ്പെടാറില്ല. വിവരമറിഞ്ഞ് അഗ്നി-രക്ഷാസേന എത്തുമ്പോഴേക്കും വനം ചാമ്പലാകും. തീ വീണത് ദുര്‍ഘട പ്രദേശങ്ങളിലാണെങ്കില്‍ പ്രത്യേകിച്ചും. വയനാട്ടില്‍ കാട്ടുതീ പ്രതിരോധത്തിനു വനം-വന്യജീവി വകുപ്പിനെ ശാക്തീകരിക്കണമെന്ന ആവശ്യത്തിനു ഉത്തരവാദപ്പെട്ടവര്‍ കാതുകൊടൂക്കുന്നില്ല. തീയില്‍നിന്നു വനത്തെ സംരക്ഷിക്കുന്നതിനു ഓരോ വര്‍ഷവും നാമമാത്ര തുകയാണ് അനുവദിക്കുന്നത്. ഈ തുക സെക്ഷന്‍ തലത്തില്‍ വീതിക്കുമ്പോള്‍ ഏതാനും കിലോമീറ്റര്‍ ഫയര്‍ലൈന്‍ നിര്‍മിക്കാനും വിരലില്‍ എണ്ണാന്‍ മാത്രം ഫയര്‍വാച്ചര്‍മാരെ നിയമിക്കാനും മാത്രമാണ് തികയുന്നത്. ഫയര്‍വാച്ചര്‍മാര്‍ക്ക് തീ പ്രതിരോധത്തിനുള്ള ലഘുയന്ത്രങ്ങള്‍, വസ്ത്രങ്ങള്‍, പാദരക്ഷകള്‍ തുടങ്ങിയവ അനുവദിക്കുന്നുമില്ല.
കാട്ടുതീ പ്രതിരോധം വനം-വന്യജീവി വകുപ്പിന്റെ മാത്രം ഉത്തരവാദിത്തമായാണ് ഇതര വകുപ്പുകള്‍ കാണുന്നത്. ഈ അവസ്ഥ മാറേണ്ടതുണ്ടെന്ന് വയനാട് പ്രകൃതിസംരക്ഷണ സമിതിപ്രസിഡന്റ് എന്‍. ബാദുഷയും സെക്രട്ടറി തോമസ് അമ്പലവയലും പറഞ്ഞു.
കേരളം വരള്‍ച്ചയിലും ജലക്ഷാമത്തിലും അമര്‍ന്നതിനു പ്രധാനകാരണം പശ്ചിമഘട്ടത്തിലെ വനങ്ങളുടെ നാശമാണ്. എന്നിരിക്കെ അവശേഷിക്കുന്ന നൈസര്‍ഗിക വനങ്ങളെ കാട്ടുതീയില്‍നിന്നു സംരക്ഷിക്കാനുള്ള ബാധ്യത ദുരന്ത നിവാരണ അഥോറിറ്റിയും തദ്ദേശ സ്വയംഭരണ സ്ഥാപനങ്ങളും ഏറ്റെടുക്കണം. സംസ്ഥാനത്ത് ഓരോ വര്‍ഷവും ഏക്കര്‍ കണക്കിനു വനമാണ് കാട്ടുതീയില്‍ ചാമ്പലാകുന്നത്. ഇതുമൂലം പരിസ്ഥിതിയിലുണ്ടാകുന്ന ആഘാതങ്ങള്‍ കനത്തതാണ്. തീപ്പിടിത്തത്തിനു കൂടുതല്‍ സാധ്യതയുള്ള വനമേഖലകളിലെ റേഞ്ചുകള്‍ക്ക് ഓരോ ഫയര്‍ എന്‍ജിനെങ്കിലും ലഭ്യമാക്കണം. കാട്ടുതീ പ്രതിരോധത്തിനുള്ള തുക ഇപ്പോഴത്തേതിന്റെ അഞ്ചിരട്ടിയാക്കണം.
കൂടുതല്‍ ഫയര്‍ വാച്ചര്‍മാരെ നിയോഗിക്കുകയും അവരെ കാട്ടുതീ പ്രതിരോധത്തിന് പ്രാപ്തരും സജ്ജരുമാക്കണം. വനമേഖലകളിലെ വിദ്യാലയങ്ങളും അയല്‍ക്കൂട്ടങ്ങളും കേന്ദ്രീകരിച്ച് ബോധവത്കരണം നടത്തണം-സമിതി ഭാരവാഹികള്‍ പറഞ്ഞു.
പ്രതികരിക്കാൻ ഇവിടെ എഴുതുക: