പത്തനാപുരം: നഗരമധ്യത്തിലെ പഴയ ഷോപ്പിംഗ് കോംപ്ലക്സ് പൊളിച്ചു തുടങ്ങി. അത്യാധുനിക സൗകര്യങ്ങളോട് കൂടിയ പുതിയ ഷോപ്പിങ് കോംപ്ലക്സ് നിര്മ്മിക്കുന്നതിനായാണ് കാലപ്പഴക്കം മൂലം ജീര്ണാവസ്ഥയിലായ കെട്ടിടം പൊളിച്ചുമാറ്റുന്നത്.
കെട്ടിടത്തില് നിന്നും വ്യാപാരികള് ഒഴിഞ്ഞ് കൊടുക്കാന് പഞ്ചായത്ത് അനുവദിച്ച സമരപരിധി ജനുവരി പതിനഞ്ചിന് അവസാനിച്ചിരുന്നു. പുനലൂര്-മൂവാറ്റുപുഴ റോഡിന് വശത്തെ കെട്ടിടമാണ് ആദ്യഘട്ടത്തില് പൊളിച്ച് മാറ്റുന്നത്. ഒരു വര്ഷം മുന്പ് തന്നെ പത്തനാപുരം പഞ്ചായത്ത് വ്യാപാരികള്ക്ക് അറിയിപ്പ് നല്കിയിരുന്നു. തുടര്ന്ന് സമയം കൂടി ഉള്പ്പെടുത്തി മൂന്ന് മാസം മുന്പ് വീണ്ടും നോട്ടീസ് നല്കിയിരുന്നു. ജനുവരിയില് നിര്മ്മാണപ്രവര്ത്തനങ്ങള് ആരംഭിക്കുമെന്ന് പഞ്ചായത്ത് ഭരണസമിതി തീരുമാനിച്ചിരുന്നതാണ്.പുതിയ ബഹുനിലമന്ദിരം നിര്മ്മിക്കുന്നതോടെ പട്ടണത്തിന്റെ മുഖഛായ തന്നെ മാറും.നിലവിലുള്ള കെട്ടിടം പൊളിച്ചുമാറ്റിയ ശേഷം മാര്ച്ച് ആദ്യവാരത്തോടെ നിര്മ്മാണം ആരംഭിക്കും. നാല് നിലകളോട് കൂടിയ കെട്ടിടമാണ് പുതിയതായി നിര്മ്മിക്കുന്നത്. ഏഴ് കോടി രൂപയാണ് പദ്ധതി വിഹിതം. 33 കടകളാണ് ഇപ്പോള് കെട്ടിടത്തില് പ്രവര്ത്തിക്കുന്നത്. പുതിയതായി നിര്മ്മിക്കുന്ന കെട്ടിടത്തില് 66 കടമുറികളുണ്ട്. വര്ഷങ്ങള്ക്ക് മുന്പ് പഞ്ചായത്ത് മാര്ക്കറ്റില് വ്യാപാരികള് വര്ദ്ധിച്ചപ്പോഴാണ് പുതിയകെട്ടിടം നിര്മ്മിച്ചത്. കഴിഞ്ഞ പഞ്ചായത്ത് ബജറ്റില് പുതിയ കെട്ടിടത്തിനായി തുക വകയിരുത്തിയിരുന്നു. എന്നാല് പുനര്നിര്മ്മാണപ്രവര്ത്തനങ്ങള് ആരംഭിച്ചിരുന്നില്ല. കെഎസ്ടിപിഎ റോഡ് നവീകരണത്തിനായി കെട്ടിടം പൊളിച്ചു മാറ്റണമെന്നും ആവശ്യപ്പെട്ടിരുന്നു.
