പള്ളുരുത്തി: പൊതുപൈപ്പുകളില് നിന്ന് മോട്ടോര് ഉപയോഗിച്ച് ജലം ഊറ്റുന്നതിനെതിരെ ജല അതോറിട്ടി നടപടി ശക്തമാക്കുന്നു. കാനകളിലൂടേയും തോടുകളിലൂടേയും കടന്നുപോകുന്ന നിരവധി പൈപ്പുകളും കാലപ്പഴക്കം മൂലം ജീര്ണ്ണാവസ്ഥയിലുമാണ് അതുകൊണ്ട് തന്നെ മോട്ടോര് ഉപയോഗിച്ച് ജലം ഊറ്റുമ്പോള് മലിനജലം പൈപ്പുകളില് പ്രവേശിക്കുകയും ചെയ്യുന്നു. ഇത്തരം പ്രവര്ത്തനം തുടര്ന്നാല് മുന്നറിയിപ്പില്ലാതെ കണക്ഷന് വിഛേദിക്കല്, പിഴ ഈടാക്കല് തുടങ്ങിയ നടപടികള് സ്വീകരിക്കാനാണ് തീരുമാനം.
കുടിവെള്ളം ഗാര്ഹികേതര ആവശ്യങ്ങള്ക്കായി ഉപയോഗിക്കുന്നവര്ക്കെതിരെയും നടപടിയുണ്ടാകും. പകര്ച്ചവ്യാധികള് തടയുന്നതിന്റെ ഭാഗമായി ക്ളോറിനേഷന് നടത്താനും തീരുമാനമുണ്ട്. ആദ്യഘട്ടമെന്ന നിലയില് ശനി,ഞായര് ദിവസങ്ങളില് ചെല്ലാനം പഞ്ചായത്ത് പ്രദേശങ്ങളില് കുടിവെള്ളത്തില് സൂപ്പര് ക്ളോറിനേഷന് നടത്തും. ഉപഭോക്താക്കള് ജലം സംഭരിച്ച് രണ്ട് മണിക്കൂറിന് ശേഷം മാത്രമേ ഉപയോഗിക്കാന് പാടുള്ളുവെന്ന് ജല അതോറിട്ടി കരുവേലിപ്പടി അസിഃ എക്സിക്യൂട്ടീവ് എഞ്ചിനീയര് അറിയിച്ചു.
