ഫ്രീസര് സംവിധാനം പ്രവര്ത്തിക്കുന്ന താലൂക്ക് ആശുപത്രിയിലെ കെട്ടിടം
ചേര്ത്തല: ദേശീയ നിലവാരത്തില് പ്രവര്ത്തിക്കുന്ന ഗവ. താലൂക്ക് ആശുപത്രിയിലെ ഫ്രീസര് തകരാറിലായിട്ട് മൂന്നുമാസം. കണ്ണടച്ച് ആശുപത്രി, നഗരസഭ അധികൃതര്. ലക്ഷങ്ങള് ചെലവഴിച്ച് സ്ഥാപിച്ച മോര്ച്ചറിയിലെ ഫ്രീസറിന്റെ പ്രവര്ത്തനം നിലച്ച് മാസങ്ങള് പിന്നിട്ടിട്ടും ഇത് പരിഹരിക്കാന് അധികൃതര് തയാറാകാത്തത് സ്വകാര്യ ആശുപത്രികളെ സഹായിക്കാനാണെന്നാണ് ആരോപണം.
ഫ്രീസര് സ്ഥാപിച്ച സ്ഥാപനത്തിന് അറ്റകുറ്റപ്പണികളുടെ ചുമതലയുണ്ടെങ്കിലും അധികാരികള് കര്ശന നിലപാട് സ്വീകരിക്കാത്തത് മൂലമാണ് തകരാറ് പരിഹരിക്കല് വൈകുന്നതെന്നാണ് വിമര്ശനം ഉയരുന്നത്.
താലൂക്ക് ആസ്ഥാനത്തെ സര്ക്കാര് ആശുപത്രിയില് ഫ്രീസര് തകരാറിലായതോടെ പോലീസും നാട്ടുകാരും ഏറെ വിഷമിക്കുകയാണ്. ജില്ലയില് ഫ്രീസര് സംവിധാനമുള്ള അപൂര്വം സര്ക്കാര് ആശുപത്രിയിലൊന്നാണിത്. താലൂക്കില് അപകടത്തില് മരിക്കുന്നവരുടെയും അജ്ഞാതരുടെയും മൃതദേഹങ്ങളും ഇവിടെയാണ് താല്ക്കാലികമായി സൂക്ഷിച്ചിരുന്നത്.
ഫ്രീസര് തകരാറിലായതോടെ സ്വകാര്യ ആശുപത്രികളെയാണ് പലരും ആശ്രയിക്കുന്നത്. വന്തുക ഇതിനായി സ്വകാര്യ ആശുപത്രി അധികാരികള് വാങ്ങുന്നതായി പരാതി ഉയര്ന്നിട്ടുണ്ട്. സാധാരണക്കാരാണ് ഇതുമൂലം ദുരിതം അനുഭവിക്കുന്നത്.
തകരാര് പരിഹരിക്കാതെ അധികൃതര് വിഷയത്തില് മൗനം പാലിക്കുന്നതിനെതിരെ ഉന്നത അധികാരികള്ക്ക് പരാതി നല്കാനും പ്രത്യക്ഷ സമര പരിപാടികള് സംഘടിപ്പിക്കാനുള്ള ഒരുക്കത്തിലാണ് വിവിധ സംഘടനകള്.
