കോട്ടയം: ഇടത്-വലത് മുന്നണികള് ദുരിതക്കയത്തിലാക്കിയ ജനങ്ങളുടെ ജീവല്പ്രശ്നങ്ങളെ മുന്നിര്ത്തിയുള്ള സമരപരിപാടികള്ക്ക് ബിജെപി കൗണ്സില് യോഗം അന്തിമരൂപം നല്കി. ജനുവരി, ഫെബ്രുവരി, മാര്ച്ച് മാസങ്ങളിലാണ് സമരം. തീരുമാനങ്ങള് ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന്, സംസ്ഥാന ജനറല് സെക്രട്ടറി കെ. സുരേന്ദ്രന് എന്നിവര് വിശദീകരിച്ചു.
റേഷന് പ്രതിസന്ധി, ദളിത് പീഡനം, ഭൂമി പ്രശ്നം, അക്രമ രാഷ്ട്രീയം ഇവ ഉയര്ത്തിയാണ് സമരങ്ങള്. ഫെബ്രുവരി ആറിന് പഞ്ചായത്ത് തലങ്ങളില് 24 മണിക്കൂര് പട്ടിണി സമരം നടത്തോടെയാണ് തുടക്കം. കേന്ദ്രം നല്കിയ അരി തരൂ എന്നതാണ് മുദ്രാവാക്യം. കേന്ദ്ര സര്ക്കാര് അനുവദിച്ച അരി ഗോഡൗണുകളില് കെട്ടിക്കിടന്നിട്ടും വിതരണം ചെയ്യാത്തത് ഭരണഘടനാ ലംഘനമാണ്.
ബുധനാഴ്ച മുതല് 25 വരെ യുവമോര്ച്ചയുടെ നേതൃത്വത്തില് എഫ് സി ഐ ഗോഡൗണുകളില് നിന്ന് അരി പിടിച്ചെടുക്കല് സമരം നടത്തും. ബുധനാഴ്ച കോഴിക്കോട് എഫ് സി ഐ ഗോഡൗണിലേക്കാണ് സമരം. ഫെബ്രുവരി 13 ന് യുവമോര്ച്ച താലൂക്ക് സപ്ലൈ ഓഫീസുകള് ഉപരോധിക്കും. ഫെബ്രുവരി 18 ന് മഹിളാമോര്ച്ച നിയോജക മണ്ഡലതലങ്ങളില് അമ്മമാരുടെ ധര്ണ്ണ നടത്തും.
ദളിത് പീഡനങ്ങള്ക്കെതിരെ പട്ടികജാതി മോര്ച്ച ജില്ലാ അദ്ധ്യക്ഷന്മാര് കോളനികള് കേന്ദ്രീകരിച്ച് ഫെബ്രുവരി 10 മുതല് 20 വരെ വാഹന പ്രചരണ ജാഥകള് നടത്തും. മാര്ച്ച് 20 ന് പട്ടിക ജാതി മോര്ച്ചയുടെ ആഭിമുഖ്യത്തില് സെക്രട്ടറിയേറ്റ് ഉപരോധിക്കും.
പിണറായി ഭരണത്തിന് കീഴില് ബിജെപി പ്രവര്ത്തകര് വ്യാപകമായി അക്രമിക്കപ്പെടുകയാണ്. ഇതിനെതിരെ ഫെബ്രുവരി ആദ്യ വാരം തിരുവനന്തപുരത്ത് സാംസ്കാരിക കൂട്ടായ്മ സംഘടിപ്പിക്കും. ജനുവരി 23ന് മഹിളാ മോര്ച്ചാ പ്രവര്ത്തകര് ജില്ലാ കേന്ദ്രങ്ങളില് ധര്ണ്ണയും നടത്തും. പാലക്കാട്ട് സിപിഎമ്മുകാര് ചുട്ടുകൊന്ന വിമലാദേവിയുടെ ചിതാഭസ്മവുമായി പാലക്കാട് നിന്ന് തിരുവനന്തപുരത്തേക്കും കാസര്കോട്ടേക്കും രണ്ട് ജാഥകള് നടത്താനും കൗണ്സില് തീരുമാനിച്ചിട്ടുണ്ട്.
ഭൂസമരങ്ങളെ ഏകോപിപ്പിക്കാന് സംസ്ഥാന അദ്ധ്യക്ഷന് കുമ്മനം രാജശേഖരന് കേരളത്തിലെ മുഴുവന് സമര കേന്ദ്രങ്ങളും സന്ദര്ശിക്കും. ജനുവരി 24 ന് പത്തനംതിട്ടയിലെ ഗവിയില് നിന്ന് യാത്ര തുടങ്ങും. മാര്ച്ച് രണ്ടാം വാരം ഭൂരഹിതരുടെ വിപുലമായ കണ്വെന്ഷന് നടത്താനും കൗണ്സില് തീരുമാനിച്ചതായി നേതാക്കള് അറിയിച്ചു. ബിജെപി കോട്ടയം ജില്ലാ അദ്ധ്യക്ഷന് എന് ഹരിയും ഒപ്പമുണ്ടായിരുന്നു.
