തൃശൂര്: പാമ്പാടി നെഹ്രു കോളെജിലെ വിദ്യാര്ഥി ജിഷ്ണുവിന്റെ ആത്മഹത്യ കോപ്പിയടിച്ചതു പിടിച്ചതു മൂലമുള്ള മനോവിഷമം മൂലമാണെന്ന് പൊലീസിന്റെ എഫ്ഐആര്. കോളേജില് നടന്ന പരീക്ഷയില് കോപ്പിയടിച്ചത് ഇന്വിജിലേറ്റര് കണ്ടുപിടിച്ചതിലുള്ള മനോവിഷമത്താല് ആത്മഹത്യ ചെയ്യുകയായിരുന്നെന്ന് എഫ്ഐആറില് പറയുന്നു.
മരിക്കണമെന്ന ഉദ്ദേശ്യത്തോടു കൂടി ഹോസ്റ്റലിലെ റൂമിനകത്തെ ബാത്ത്റൂമില് തോര്ത്തുമുണ്ടില് കെട്ടി തൂങ്ങുകയായിരുന്നെന്നാണ് പഴയന്നൂര് എസ്ഐ തയാറാക്കിയ എഫ്ഐആറില് പറയുന്നത്. ജിഷ്ണുവിനു നേരേയുണ്ടായ മാനസിക- ശാരീരിക പീഡനങ്ങളെ കുറിച്ചോ ശരീരത്തിലേറ്റ മുറിപ്പാടുകളെ കുറിച്ചോ എഫ്ഐആറില് വ്യക്തമാക്കിയിട്ടില്ല. എന്നാല് കോപ്പിയടിച്ചതായി പറയുന്ന സംഭവം സാങ്കേതിക സര്വകലാശാല തള്ളി.
കോപ്പിയടിച്ചകാര്യം കോളേജ് അധികൃതര് റിപ്പോര്ട്ട് ചെയ്തിട്ടില്ലെന്ന് പരീക്ഷാകണ്ട്രോളര്തന്നെ കഴിഞ്ഞദിവസം വ്യക്തമാക്കിയിരുന്നു. ഈ സാഹചര്യത്തിലാണ് പോലീസ് നിലപാട് ദുരൂഹമാകുന്നത്. പഠിക്കാന് സമര്ത്ഥനായിരുന്ന ജിഷ്ണുവിന് കോപ്പിയടിക്കേണ്ട കാര്യമില്ലെന്ന് ബന്ധുക്കളും സുഹൃത്തുക്കളും ചൂണ്ടിക്കാണിക്കുന്നു.
