കാലടി ശ്രീശങ്കരാചാര്യ സംസ്കൃത സര്വകലാശാലയില് യുജിസി അനുവദിച്ച ദക്ഷിണേന്ത്യന് സര്വകലാശാലകളിലെ പ്രഥമ സ്വാമി വിവേകാനന്ദ ചെയര് തദ്ദേശ സ്വയംഭരണമന്ത്രി ഡോ.കെ.ടി.ജലീല് ഉദ്ഘാടനം ചെയ്യുന്നു. വൈസ് ചാന്സലര് ഡോ.എം.സി.ദിലീപ്കുമാര്, റോജി എം.ജോണ് എംഎല്എ എന്നിവര് സമീപം.
കാലടി: സ്വാമി വിവേകാനന്ദന് വിവിധ മതങ്ങളുടെ അന്തരാര്ത്ഥങ്ങളെ സമന്വയിപ്പിച്ച വിപ്ലവകാരിയായ ആത്മീയാചാര്യനാണെന്ന് മന്ത്രി ഡോ. കെ.ടി. ജലീല്. കാലടി ശ്രീ ശങ്കരാചാര്യ സംസ്കൃത സര്വകലാശാലയില് യുജിസി അനുവദിച്ച ദക്ഷിണേന്ത്യന് സര്വകലാശാലകളിലെ പ്രഥമ സ്വാമി വിവേകാനന്ദ ചെയറിന്റെ ഉദ്ഘാടനം നിര്വ്വഹിക്കുകയായിരുന്നു അദ്ദേഹം.
കേവലമൊരു ആത്മീയാചാര്യനായിരുന്നില്ല സ്വാമി വിവേകാനന്ദന്. അദ്ദേഹത്തിന്റെ വിദ്യാഭ്യാസ ദര്ശനങ്ങള്ക്കും ചിന്തകള്ക്കും സമകാലിക പ്രസക്തി വര്ദ്ധിച്ചു. സര്വ്വമതസത്യവാദമാണ് തന്റെ മതമെന്ന് ജീവിതത്തിലൂടെ കാണിച്ച സ്വാമി വിവേകാനന്ദന് ലോകം ആഗ്രഹിച്ച വ്യക്തിത്വമാണ്. രാജ്യത്തിന്റെ ബഹുസ്വരതയ്ക്ക് ഒട്ടേറെ വെല്ലുവിളികള് നേരിടുന്ന ഈ കാലഘട്ടത്തില് സ്വാമി വിവേകാനന്ദന്റെ ചിന്തകളും ദര്ശനങ്ങളും മനുഷ്യരാശിയുടെ വഴികാട്ടിയാണെന്നും അദ്ദേഹം കൂട്ടിച്ചേര്ത്തു.
കനകധാരാ ഓഡിറ്റോറിയത്തില് നടന്ന സമ്മേളനത്തില് റോജി എം. ജോണ് എംഎല്എ അദ്ധ്യക്ഷത വഹിച്ചു. വൈസ് ചാന്സലര് ഡോ. എം. സി. ദിലീപ്കുമാര് ആമുഖ പ്രഭാഷണം നടത്തി. വിവവേകാനന്ദ ചെയര് പ്രൊഫസര് ഡോ. എ. ഗിരിജ ചെയറിന്റെ പ്രവര്ത്തനങ്ങള് വിശദീകരിച്ചു. കാലടി ഗ്രാമപഞ്ചായത്ത് പ്രസിഡന്റും കേരള ഗ്രാമപഞ്ചായത്ത് അസോസിയേഷന് സംസ്ഥാന പ്രസിഡന്റുമായ അഡ്വ. കെ. തുളസി മുഖ്യപ്രഭാഷണം നിര്വ്വഹിച്ചു. അഡ്വ. ജോസ് തെറ്റയില്, ജില്ലാ പഞ്ചായത്ത് അംഗം ശാരദാമോഹന്, സിന്ഡിക്കേറ്റ് അംഗങ്ങളായ ഡോ. ടി. മിനി, വിഷ്ണു ആനന്ദ്, സംസ്കൃതം വ്യാകരണം വിഭാഗം മേധാവി ഡോ. എം. മണിമോഹനന് എന്നിവര് പ്രസംഗിച്ചു.
