ശബരിമല: ആഴത്തിലുള്ള ആത്മീയ അറിവുകള് പകര്ന്നുനല്കിയ പതിമൂന്നുകാരന് മുന്നില് സദസ്സിലെ കാരണവന്മാര് ശിരസ്സ് കുനിച്ചു.
തിരുവനന്തപുരം കാരക്കോണം പിപിഎംഎച്ച് സ്കൂളിലെ ഒന്പതാം ക്ലാസ്സ് വിദ്യാര്ത്ഥി രാമവര്മ്മന്ചിറ ഭരത്ചന്ദ്രനാണ് ആത്മീയ പ്രഭാഷണത്തിലൂടെ സദസ്സിനെ അത്ഭുതചിത്തരക്കായിത്. ആര്ഷഭാരത സംസ്കാരത്തിന്റെ ആഴങ്ങളിലേക്ക് ഇറങ്ങിയുള്ള പഠനവും വാക്ചാതുര്യവും അവതരണവും ഒത്തുചേര്ന്ന പ്രഭാഷണം കേള്ക്കാന് ആയിരങ്ങളാണ് തടിച്ചുകൂടയിത്. അയ്യപ്പ മാഹാത്മ്യത്തെക്കുറിച്ചും ഹിന്ദുപുരാണങ്ങളെ കുറിച്ചുമായിരുന്നു പ്രഭാഷണം.
വിവേകാനന്ദ സ്വാമികളെ ഗുരുസ്ഥാനത്ത് പ്രതിഷ്ഠിച്ചാണ് ഭരത്ചന്ദ്രന് പുരാണങ്ങള് പഠിച്ചുതുടങ്ങിയത്. എട്ടാം വയസ്സില് തുടങ്ങിയ ഈ പ്രഭാഷണയാത്രയിലൂടെ ഇതിനകം 521 വേദികള് പിന്നിട്ടു. സ്വാമി വിവേകാനന്ദന്, ശ്രീമദ്ഭഗവത്ഗീത, രാമായണ മഹാത്മ്യം, ദേവി മഹാത്മ്യം, സ്കന്ദപുരാണം, വിഷ്ണുപുരാണം, ശിവപുരാണം, ഗണപതി പുരാണം, ഗരുഡപുരാണം തുടങ്ങിയവയെല്ലാം ഈ ബാലന് മനപാഠമാണ്.
അച്ഛന് സി. ചന്ദ്രശേഖരന് നായരും അമ്മ ബി. അര്ച്ചനകുമാരിയും മകന്റെ ഈ അദ്ധ്യാത്മിക യാത്രയ്ക്ക് പൂര്ണ്ണ പിന്തുണ നല്കുന്നു. നിരവധി പുരസ്കാരവും ഇതിനകം ഭരത്ചന്ദ്രനെ തേടി വന്നു. ഒട്ടേറെ വ്യക്തികളും പ്രകീര്ത്തിച്ചു. തിരുവതാംകൂര് ദേവസ്വം പ്രസിഡന്റ് പ്രയാര്ഗോപാലകൃഷ്ണന് ശ്രി അയ്യപ്പ ഓഡിറ്റോറിയത്തില് നടന്ന ചടങ്ങില് ഭരത്ചന്ദ്രനെ ആദരിച്ചു.
ഹൈന്ദവപുരാണത്തിന്റെ പകരം വെക്കാനില്ലാത്ത മഹദ്സന്ദേശങ്ങള് വരും തലമുറയിലേക്ക് കൈമാറ്റം ചെയ്യുന്ന ഉദ്യമത്തിനുള്ള ദൈവനിയോമാണ് ഭരത്ചന്ദ്രനെന്ന് അദ്ദേഹം പറഞ്ഞു.
