ആലപ്പുഴ: റേഷന് വിതരണം വരെ അവതാളത്തിലാക്കി ഭക്ഷ്യവകുപ്പിന്റെ പ്രവര്ത്തനത്തെ പ്രതിസന്ധിയിലാക്കിയതിന് പ്രധാനകാരണം സിപിഐയിലെ വിഭാഗീയത. സംസ്ഥാന സെക്രട്ടറി കാനം രാജേന്ദ്രന് നയിക്കുന്ന ഔദ്യോഗിക പക്ഷവും കെ.ഇ. ഇസ്മയില് വിഭാഗവും തമ്മില് തുടരുന്ന ഭിന്നത സിപിഐക്കാര് ഭരിക്കുന്ന എല്ലാ വകുപ്പുകളെയും സാരമായി ബാധിക്കുന്നുവെന്ന് വിമര്ശനം ഉയരുന്നു.
നിലവിലെ മന്ത്രിമാരില് വി.എസ്. സുനില്കുമാര് ഒഴികെയുള്ളവര് കാനം വിഭാഗക്കാരാണ്. പ്രമുഖരായ പലരെയും ഒഴിവാക്കി സ്വന്തം പക്ഷക്കാരെ സംസ്ഥാന സെക്രട്ടറി, മന്ത്രിമാരായി നിയോഗിച്ചതില് പാര്ട്ടിയില് അസംതൃപ്തി തുടരുകയാണ്. തുടര്ന്ന് വിവിധ കോര്പ്പറേഷന്, ബോര്ഡ് ചെയര്മാന്മാരെ നിയോഗിച്ചതിലും കാനം രാജേന്ദ്രന് വിഭാഗം ഏകപക്ഷീയമായ തീരുമാനം കൈക്കൊള്ളുകയായിരുന്നു. ഇതിനെതിരെ കഴിഞ്ഞ സംസ്ഥാന കൗണ്സിലില് മറുപക്ഷം ആഞ്ഞടിച്ചിരുന്നു. സുനില് കുമാറിനൊഴികെ മറ്റു സിപിഐ മന്ത്രിമാര്ക്ക് വകുപ്പിലോ, ഉദ്യോഗസ്ഥരിലോ യാതൊരു നിയന്ത്രണവും ഇല്ലെന്ന് ഒരു വിഭാഗം സിപിഐ നേതാക്കള് തന്നെ വിമര്ശനം ഉന്നയിക്കുന്നു.
ഭക്ഷ്യവകുപ്പിന്റെ പ്രവര്ത്തനങ്ങളെയും മന്ത്രിയുടെ കഴിവില്ലായ്മ സാരമായി ബാധിച്ചിരിക്കുകയാണ്. ഉദ്യോഗസ്ഥരെ ഇപ്പോഴും നിയന്ത്രിക്കുന്നത് ഒരു മുന് മന്ത്രിയാണത്രെ, ഇപ്പോഴത്തെ മന്ത്രി പ്രഖ്യാപിക്കുന്നവ ഒന്നും തന്നെ ഉയര്ന്ന ഉദ്യോഗസ്ഥര് പോലും നടപ്പാക്കുന്നില്ല, സിപിഐയുടെ നിയന്ത്രണത്തിലുള്ള ജീവനക്കാരുടെ യൂണിയനും മന്ത്രിയുടെ വാക്കിന് പുല്ലുവിലയാണ്. മുന്മന്ത്രിയും ഇപ്പോഴത്തെ മന്ത്രിയുമായുള്ള ഭിന്നത റേഷന് വിതരണത്തെയും കാര്യമായി ബാധിച്ചു. മൊത്തവ്യാപാരികളാണ് ഇപ്പോഴും റേഷന് വിതരണം നിയന്ത്രിക്കുന്നത്.
വകുപ്പില് പ്രശ്നങ്ങള് ഉണ്ടെന്ന് വ്യക്തമായ മുഖ്യമന്ത്രി ഭക്ഷ്യവകുപ്പിന്റെ പ്രവര്ത്തനങ്ങളില് ഇടപെടാന് ശ്രമിച്ചെങ്കിലും സിപിഐയുടെ പ്രതിഷേധത്തെ തുടര്ന്ന് പരാജയപ്പെട്ടു. മന്ത്രി എ.കെ. ബാലന് പരസ്യമായി പോലും സിപിഐ മന്ത്രിമാരുടെ കഴിവില്ലായ്മ ചൂണ്ടിക്കാട്ടിയതും ഈ സാഹചര്യത്തിലാണ്. റേഷന്വിതരണത്തിലെ പാളിച്ചയില് ഭക്ഷ്യവകുപ്പിനെതിരെ വ്യാപക പ്രതിഷേധം ഉയര്ന്നിട്ടും തുടക്കത്തില് സിപിഎം പ്രതിരോധവുമായി രംഗത്തെത്താതിരുന്നതും സിപിഐയിലെ ഭിന്നതയും ചിലരുടെ പിന്തുണയോടെ നടക്കുന്ന തീവെട്ടിക്കൊള്ളയും ബോദ്ധ്യപ്പെട്ടതിനാലാണ്.
ഒടുവില് എല്ഡിഎഫ് യോഗത്തില് സിപിഐ തന്നെ ഭക്ഷ്യവകുപ്പിനെതിരെയുള്ള ആക്രമണങ്ങള് പ്രതിരോധിക്കണമെന്ന് ആവശ്യം ഉന്നയിച്ചതോടെയാണ് കേന്ദ്രവിരുദ്ധ സമരവുമായി രംഗത്തിറങ്ങാന് സിപിഎം തീരുമാനമെടുത്തത്. വകുപ്പ് മന്ത്രി പി. തിലോത്തമന് അഴിമതിക്കാരനല്ലെങ്കിലും കാര്യക്ഷമമമായി പ്രവര്ത്തിക്കാന് അദ്ദേഹത്തിന് കഴിയുന്നില്ലെന്ന വിലയിരുത്തല് സിപിഎമ്മിന് മാത്രമല്ല, ഒരു വിഭാഗം സിപിഐക്കാര്ക്കുമുണ്ട്.
റേഷന് വ്യാപാരികളുടെ പ്രബല സംഘടനകളിലൊന്നിനെ നയിച്ചിരുന്നതും പി. തിലോത്തമനായിരുന്നു. മന്ത്രിയായതിന് ശേഷമാണ് അദ്ദേഹം സംഘടനാ നേതൃത്വം ഒഴിഞ്ഞത്. പകരം ചുമതല നല്കിയത് പാര്ട്ടിയിലെ തന്റെ വിശ്വസ്തനായ യുവനേതാവിനാണ്. ഒരു വിഭാഗം റേഷന് വ്യാപാരികളും മൊത്തവ്യാപാരികളും സംഘടിതമായി നടത്തുന്ന അഴിമതികളില് മന്ത്രിക്ക് മൂകസാക്ഷിയായി നില്ക്കാനെ കഴിയുന്നുള്ളുവെന്നാണ് വിമര്ശനം ഉയരുന്നത്.
