കീഴാറൂര്: സുമനസ്സുകളുടെ കാരുണ്യം തേടി ശോഭനയും കുടുംബവും. നെടുങ്ങോട് ഏറെക്കോണം റോഡരികത്ത് വീട്ടില് ശോഭന കിടപ്പിലായിട്ട് ഏഴുവര്ഷം. ഭര്ത്താവും രണ്ടുകുട്ടികളും അടങ്ങുന്നതാണ് ശോഭനയുടെ കുടുംബം. ഭര്ത്താവ് സൈമണ് കൂലിപ്പണിക്കാരനാണ്. മൂത്തമകന് അഖില് ഡിഗ്രിവിദ്യാര്ഥിയും ഇളയമകള് ശരണ്യ കീഴാറൂര് സ്കൂളില് പ്ലസ്ടു വിദ്യാര്ഥിനിയുമാണ്.
വര്ഷങ്ങള്ക്ക് മുമ്പ് തുടങ്ങിയ ശരീരവേദന പിന്നീട് ശോഭനയെ കിടപ്പുരോഗിയാക്കി. റൂമറ്റോളജി ഓര്ത്തഡേറ്റിസ് എന്ന അപൂര്വ രോഗമാണ് ശോഭനയെ ബാധിച്ചിരിക്കുന്നതെന്ന് ഡോക്ടര്മാര് സ്ഥിരീകരിച്ചു. മെഡിക്കല് കോളേജിലെ ചികിത്സാ ചെലവ് താങ്ങാന് കഴിയാതെ ഭര്ത്താവ് ശോഭനയെ വീട്ടിലേക്ക് കൊണ്ടുവന്നു. അരയ്ക്ക് താഴെ പൂര്ണമായും തളര്ന്ന അവസ്ഥയില് കഴിയുന്ന ശോഭനയ്ക്ക് മാസത്തില് രണ്ടുമൂന്ന് തവണ മൂത്രറ്റിയൂബ് മാറ്റി ഇടണം. ശോഭനയുടെ സ്ഥിതി കണ്ട് ചെമ്പൂര് ഗവ: ആശുപത്രി ജീവനക്കാര് വീട്ടില് വന്ന് ചികിത്സ നടത്തും. 10 സെന്റ് പുരയിടത്തില് ഇടിഞ്ഞുവീഴാറായ ഒരുവീടാണ് ഈ കുടുംബത്തിന്റെ ആകെ സമ്പാദ്യം. ഇവരുടെ വീട്ടിലെ വെള്ളമില്ലാത്ത കിണറിന്റെ ദുരവസ്ഥ ചൂണ്ടിക്കാട്ടി ബന്ധപ്പെട്ടവര്ക്ക് വാട്ടര് കണക്ഷനുള്ള അപേക്ഷ കൊടുത്തെങ്കിലും അവര് തിരിഞ്ഞുനോക്കിയിട്ടില്ല. ഇവര്ക്ക് വേണ്ടത് തുടര് ചികിത്സയ്ക്കു സഹായമാണ്. ഇതിന്റെ നടപടി ക്രമങ്ങള് ബന്ധപ്പെട്ട അധികാരികളുടെ മുന്നിലെത്തിക്കാന് വാര്ഡ് മെംബര് അഞ്ജന കിണഞ്ഞു ശ്രമിക്കുന്നുണ്ട്. തന്നെയും കുടുംബത്തെയും സഹായിക്കാന് മനസ്സുള്ളവര് മുന്നോട്ടുവരുമെന്ന പ്രതീക്ഷയിലാണ് കിടപ്പിലായ ശോഭന. ഇവര്ക്ക് വേണ്ടി ഒറ്റശേഖരമംഗലം എസ്ബിടി ബ്രാഞ്ചില് അക്കൗണ്ട് തുറന്നിട്ടുണ്ട്. അക്കൗണ്ട് നമ്പര് 67200908234, ഐഎഫ്എസ് നമ്പര് എസ്ബിടി ആര് 0000322. ബന്ധപ്പെടേണ്ട ഫോണ് നമ്പര് – 8606863627.
കിടപ്പിലായ ശോഭന
