പേരൂര്ക്കട: രോഗവിമുക്തിക്കും രോഗശമനത്തിനുമുള്ള ഉത്തമ മരുന്ന് സംഗീതമാണെന്ന തിരിച്ചറിവ് മികച്ച രീതിയില് പരീക്ഷിക്കാന് ഒരുങ്ങുകയാണ് ഊളമ്പാറയിലെ മാനസികാരോഗ്യ കേന്ദ്രം. ഇവിടെ ആരംഭിച്ച മ്യൂസിക് ഗാര്ഡന് പരിപാടി ഇതിലേക്കുള്ള ചുവടുവയ്പാണ്. മാര്ത്തോമ്മാ സഭയുടെ നന്തന്കോട്ടെ സോഷ്യല് സര്വ്വീസ് ഫോറവും തിരുവനന്തപുരത്തെ സ്വരാഞ്ജലിയും സംയുക്തമായാണ് പരിപാടി സംഘടിപ്പിച്ചത്. മാനസികാരോഗ്യ കേന്ദ്രത്തില് മികച്ച ഒരു ഉദ്യാനം തയ്യാറാക്കി സംഗീതത്തിന്റെ ഒരു ലോകം സൃഷ്ടിക്കുകയും അതിലൂടെ അന്തേവാസികളുടെ മാനസികോല്ലാസം സാധ്യമാക്കുകയും ചെയ്യുകയാണ് ലക്ഷ്യം. പാളയം ഇമാം വി.പി ഷുഹൈബ് മൗലവിയും മാര്ത്തോമ്മാ ചര്ച്ച് വികാരി റവ. സന്തോഷ് തോമസും ചേര്ന്ന് സംഗീത ആരാമത്തിനുള്ള ചെടി നട്ടുകൊണ്ടാണ് ഉദ്ഘാടനം നിര്വ്വഹിച്ചത്. ഇതിനൊപ്പം ഒരു സംഗീതാസ്വാദന കോഴ്സും മാനസികാരോഗ്യ കേന്ദ്രത്തില് നടത്തുന്നുണ്ട്. അന്തേവാസികളെയെല്ലാം പങ്കെടുപ്പിച്ചുകൊണ്ട്, ഫലത്തില് ഒരു സംഗീത ചികിത്സതന്നെയാണ് ഇതിലൂടെ ഉദ്ദേശിക്കുന്നത്. രോഗവിമുക്തി നേടാറായവരും കടുത്ത മാനസിക രോഗമുള്ളവരും കേന്ദ്രത്തിലുണ്ട്. ഇവരുടെ രോഗവിമുക്തിയാണ് പ്രധാന ലക്ഷ്യം. ചടങ്ങില് മാനസികാരോഗ്യ കേന്ദ്രം സൂപ്രണ്ട് എം.എന് ജയശ്രീ, സീനിയര് സൈക്യാട്രിസ്റ്റ് ഡോ. ബി. സാഗര്, സ്വരാഞ്ജലി ചെയര്മാന് പി.ആര്. സുകുമാരന്, സെക്രട്ടറി ശ്രീകുമാരന് തമ്പി, ഡോ. ജോണ് ജെ. ഇടയാറുള, പാര്വ്വതിപുരം പത്മനാഭയ്യര് എന്നിവര് പങ്കെടുത്തു. മാനസികാരോഗ്യ കേന്ദ്രത്തിലെ അന്തേവാസികള് പങ്കെടുത്ത സംഗീത പരിപാടിയും ഇതോടൊപ്പം സംഘടിപ്പിച്ചു.
അന്തേവാസികള് അവതരിപ്പിച്ച സംഗീത പരിപാടിയില് നിന്ന്
