സ്വാമി ഗുരുരത്നം ജ്ഞാനതപസ്വി സന്തോഷിന്റെ വീട്ടിലെത്തി കുടുംബാംഗങ്ങളെ ആശ്വസിപ്പിക്കുന്നു
അമ്പലപ്പുഴ: നീണ്ട ഇരുപതു വര്ഷക്കാലമായി വിദേശത്ത് തടവറയില് കഴിയുന്ന നിരപരാധിയായ മലയാളി യുവാവിന്റെ കുടുംബത്തെ ആശ്വസിപ്പിക്കാന് ശാന്തിഗിരി ഓര്ഗനൈസിങ് സെക്രട്ടറി സ്വാമി ഗുരുരത്നം ജ്ഞാന തപസ്വിയെത്തി. അമ്പലപ്പുഴ വടക്ക് പഞ്ചായത്ത് കാക്കാഴം വടക്കേ വെള്ളുപ്പറമ്പ് വീട്ടില് പരേതനായ തങ്കപ്പന് – ഭാരതിയമ്മ ദമ്പതികളുടെ മകന് സന്തോഷ്(41) ആണ് ഒമാനില് ജയിലില് കഴിയുന്നത്.
കുടുംബത്തിന്റെ പട്ടിണി മാറ്റാനാണ് സന്തോഷ് ഒമാനിലെത്തിയത്. 1997ല് ഇവിടെ കടയില് ജോലി ചെയ്യ്തിരുന്ന സമയത്താണ് സന്തോഷിന്റെ ജീവിതം ഇരുളിലാകുന്നത്. സന്തോഷ് ജോലി ചെയ്തിരുന്ന കടയില് നിന്നും നാല് പാകിസ്ഥാന് യുവാക്കള് കട്ടര് വാങ്ങി. ഈ കട്ടര് ഉപയോഗിച്ച് ഇവര് ബാങ്ക് കുത്തിത്തുറന്നു. ഇതിനിടയില് ബാങ്കിലെ സുരക്ഷാ ജീവനക്കാരെ ഇവര് വധിക്കുകയും ചെയ്യ്തു.
കേസില് പ്രതിയായ സന്തോഷും തിരുവനന്തപുരം സ്വദേശിയായ ഷാജഹാനും ജയിലായി. ഇതിനിടയില് ഷാജഹാന് പുറത്തിറങ്ങിയെങ്കിലും സന്തോഷ് രണ്ട് പതിറ്റാണ്ടായി ജയിലാണ്. മകനെ ഒരു നോക്ക് കാണണമെന്ന ആഗ്രഹം സഫലീകരിക്കാതെ അമ്മ ഭാരതിയും മരിച്ചു. അമ്മയുടെ മൃതദേഹം ഒരുനോക്കു കാണാന് പോലും സന്തോഷിനായില്ല. ഇതിനിടെ സന്തോഷിന്റെ മോചനത്തിനായി പുന്നപ്ര തയ്യില് ഹബീബ്ബ് റഹ്മാന് ശ്രമം തുടങ്ങി. ഒമാനിലെ വ്യവസായിയായ ഇദ്ദേഹം സന്തോഷിന്റെ ദുരിത ജീവിതം കേട്ടറിഞ്ഞ് സന്തോഷിനെ ജയിലില് പോയി കണ്ടിരുന്നു.
ഹബീമ്പില് നിന്ന് സന്തോഷിനെ പറ്റി കേട്ടറിഞ്ഞ ശാന്തിഗിരി ഓര്ഗനൈസിങ് സെക്രട്ടറി സ്വാമി ഗുരുരത്നം ജ്ഞാന തപസ്വി കേന്ദ്ര സര്ക്കാരുമായി ബന്ധപ്പെട്ടു. ഇതിനായി കേന്ദ്രമന്ത്രിമാരായ രാജ്നാഥ് സിങ്, സുഷമ സ്വരാജ് എന്നിവരുമായി കൂടിക്കാഴ്ച നടത്തുമെന്നും അദ്ദേഹം പറഞ്ഞു.
