മാവേലിക്കര: ആലപ്പുഴ ജില്ലയിലെ പ്രമുഖ സഹകരണബാങ്കായ മാവേലിക്കര താലൂക്ക് സഹകരണബാങ്കില് നടന്ന കോടിക്കണക്കിന് രൂപയുടെ സാമ്പത്തിക തിരിമറി പുറത്തുവന്നിരിക്കുന്ന സാഹചര്യത്തില് ഇതുമായി ബന്ധപ്പെട്ട മുഴുവന് കാര്യങ്ങളും സുതാര്യമായി അന്വേഷിച്ച് പുറത്തുകൊണ്ടുവരുവാന് (എന്ഫോഴ്സ്മെന്റ്/സിബിഐ) കേന്ദ്ര ഏജന്സികളെക്കൊണ്ട് അന്വേഷണം നടത്തുവാന് അധികൃതര് തയ്യാറാകണമെന്ന് ബിജെപി മാവേലിക്കര നിയോജകമണ്ഡലം നേതൃയോഗം ആവശ്യപ്പെടുന്നു.
സാമ്പത്തിക ക്രമക്കേടിന് ജനപ്രതിനിധികളുടെയും രാഷ്ട്രീയ നേതാക്കന്മാരുടെയും ആശിര്വാദവും വഴിവിട്ട് സഹായവും ഉണ്ടായിട്ടുണ്ട്. പ്രമുഖ രാഷ്ട്രീയപാര്ട്ടി നേതാക്കന്മാരുടെ ഭാര്യമാരും ബന്ധുക്കളുമാണ് ഇവിടെ ജോലിചെയ്യുന്നത്.
അവരെ ഉപയോഗിച്ച് നടത്തിയ തട്ടിപ്പില് ഈ സ്ഥാപനത്തെ വിശ്വസിച്ച് പണം നിക്ഷേപിക്കുകയും സ്വര്ണ്ണപണയം നല്കി വായ്പ എടുത്ത സാധാരണക്കാരായ ജനങ്ങളുടെ ആശങ്കകള് ഒഴിവാക്കി അവരുടെ പണവും സ്വര്ണ്ണവും അവര് ആവശ്യപ്പെടുന്ന സമയത്ത് തിരിച്ച് നല്കണമെന്ന് ബിജെപി ആവശ്യപ്പെട്ടു.
ബാങ്കില് നടന്ന സാമ്പത്തിക തട്ടിപ്പിന് ഉത്തരവാദികളായവരെ നിയമത്തിന് മുന്നില് എത്തിക്കുന്നതുവരെ ശക്തമായ പ്രക്ഷോഭ പരിപാടികളുമായി മുന്നോട്ടുപോകുവാന് ബിജെപി നിയോജകമണ്ഡലം നേതൃയോഗം തീരുമാനിച്ചു.
ബിജെപി നിയോജകമണ്ഡലം പ്രസിഡന്റ് വെട്ടിയാര് മണിക്കുട്ടന്റെ അദ്ധ്യക്ഷതയില് കൂടിയ യോഗത്തില് ബിജെപി ജില്ലാ ട്രഷറര് കെ.ജി. കര്ത്ത, ജില്ലാ ഉപാദ്ധ്യക്ഷ സുഷമ വി. നായര്, നിയോജകമണ്ഡലം ജനറല് സെക്രട്ടറിമാരായ അഡ്വ. കെ.കെ. അനൂപ്, അനില് വള്ളികുന്നം, നിയോജകമണ്ഡലം ഉപാദ്ധ്യക്ഷന് സുരേഷ് പൂവത്തുമഠം എന്നിവര് പ്രസംഗിച്ചു.
