പട്ടിക വര്‍ഗ്ഗ വികസന വകുപ്പ് മിഷന്‍ എല്‍.ഡി.സി. തുടങ്ങി
കല്‍പ്പറ്റ : കേരള പബ്ലിക് സര്‍വ്വീസ് കമ്മീഷന്‍ നടത്തുന്ന എല്‍.ഡി.ക്ലാര്‍ക്ക് പരീക്ഷയില്‍ ജില്ലയിലെ അടിയ, പണിയ, കാട്ടുനായ്‌ക്ക, ഊരാളി വിഭാഗങ്ങളിലെ ഉദേ്യാഗാര്‍ത്ഥികളുടെ നിയമനമുറപ്പുവരുത്തുന്നതിനായി പട്ടിക വര്‍ഗ്ഗ വികസന വകുപ്പ് ‘മിഷന്‍ എല്‍.ഡി.സി.’ക്ക് തുടക്കമിട്ടു. ജില്ലാ കളക്ടര്‍ ഡോ.ബി.എസ്. തിരുമേനിയുടെയും സബ് കളക്ടര്‍ വി.ആര്‍.പ്രേംകുമാറിന്റെയും നിര്‍ദ്ദേശമാണിത്. 948 പേര്‍ മെയിന്‍ ലിസ്റ്റില്‍ ഇടംപിടിച്ച നിലവിലെ എല്‍.ഡി.ക്ലാര്‍ക്ക് ലിസ്റ്റില്‍ മൂന്ന് പേര്‍ മാത്രമാണ് പട്ടിക വര്‍ഗ്ഗ വിഭാഗക്കാരായിട്ടുള്ളത്.
പട്ടിക വര്‍ഗ്ഗ വികസന വകുപ്പ് കല്‍പ്പറ്റയില്‍ അമൃദ് എന്ന സ്ഥാപനം മുഖേന കഴിഞ്ഞ നാലൂ വര്‍ഷങ്ങളിലായി അറുന്നൂറോളം പട്ടിക വര്‍ഗ്ഗ ഉദേ്യാഗാര്‍ത്ഥികള്‍ക്ക് പി.എസ്.സി. പരിശീലനം നല്‍കിയതില്‍ 93 പേര്‍ക്ക് ഇതിനകം വിവിധ തസ്തികകളിലായി സര്‍ക്കാര്‍ ജോലി ലഭിച്ചിട്ടുണ്ട്. ഇതില്‍ അഞ്ച് പേര്‍ മാത്രമാണ് പണിയ വിഭാഗത്തില്‍ നിന്നുള്ളത്. കാട്ടുനായ്‌ക്ക, അടിയ, ഊരാളി എന്നീ പിന്നോക്ക പട്ടിക വര്‍ഗ്ഗ സമുദായങ്ങളില്‍ നിന്ന് സര്‍ക്കാര്‍ നിയമനം ലഭിക്കുന്നത് വളരെ കുറവാണ്. ആദ്യഘട്ടമായി വണ്‍ ടൈം രജിസ്‌ട്രേഷന്‍ നടത്താത്ത ഈ വിഭാഗങ്ങളിലെ അഭ്യസ്ഥവിദ്യര്‍ക്ക് കല്‍പ്പറ്റ സിവില്‍ സ്റ്റേഷനിലെ ഐ.റ്റി.ഡി.പി. ഓഫീസിലും ബത്തേരി മിനി സിവില്‍ സ്റ്റേഷനിലുള്ള ട്രൈബല്‍ ഡവലപ്‌മെന്റ് ഓഫീസിലും മാനന്തവാടി പോലീസ് സ്റ്റേഷന് സമീപമുള്ള ട്രൈബല്‍ ഡവലപ്‌മെന്റ് ഓഫീസിലും പ്രവര്‍ത്തി ദിവസങ്ങളില്‍ രാവിലെ 10 മുതല്‍ വൈകീട്ട് അഞ്ച് വരെ സഹായി കേന്ദ്രം മുഖേന സൗജന്യ രജിസ്‌ട്രേഷന്‍ നടത്തുന്നതിന് സൗകര്യമുണ്ട്. കല്‍പ്പറ്റ കൈനാട്ടിയിലുള്ള അമൃദിലും സൗജന്യ രജിസ്‌ട്രേഷന്‍ ചെയ്യാം.
ദുര്‍ഘടപ്രദേശങ്ങളില്‍ താമസിക്കുന്ന പട്ടികവര്‍ഗ്ഗക്കാര്‍ക്ക് രജിസ്‌ട്രേഷന്‍ നടത്തുന്നതിന് ജില്ലാ എംപ്ലോയ്‌മെന്റ് ഓഫീസറുടെ നേതൃത്വത്തില്‍ കോളനി സന്ദര്‍ശിച്ച് രജിസ്‌ട്രേഷന്‍ നടത്തുന്നുണ്ട്. ഓണ്‍ലൈനായി പരീക്ഷയ്‌ക്ക് അപേക്ഷിക്കുന്നതിനും ഫോട്ടോ, ഒപ്പ് എന്നിവ സ്‌കാന്‍ ചെയ്യുന്നതിനും സൗകര്യമുണ്ടാകും.
വൈത്തിരി, മാനന്തവാടി, ബത്തേരി എന്നിവിടങ്ങളിലായിരിക്കും പരിശീലനകേന്ദ്രം. പരിശീലനാര്‍ത്ഥികള്‍ക്ക് റാങ്ക് ഫയലും പരിശീലന സാമഗ്രികളും സൗജന്യമായി നല്‍കുന്നതോടൊപ്പം യാത്രാബത്തയും നല്‍കും. സര്‍ക്കാര്‍ ജോലി ലഭിക്കാത്ത അഭ്യസ്ഥവിദ്യരായ പട്ടികവര്‍ഗ്ഗക്കാരുടെ പ്രതേ്യക ഡാറ്റാ ബാങ്ക് തയ്യാറാക്കി വിവിധ മേഖലകളില്‍ നിയമനത്തിനുള്ള അവസരമൊരുക്കും.
പ്രതികരിക്കാൻ ഇവിടെ എഴുതുക: